काठमाडौँ । नेकपा एमालेले नेपाली सेना, निजामती प्रशासन तथा अन्तर्राष्ट्रिय समुदायसँग पार्टीको सम्बन्ध पूर्ववत् रूपमा कायम रहेको र मित्रवत् ढंगले अघि बढिरहेको जनाएको छ।
पार्टी केन्द्रीय कार्यालय च्यासलमा सम्पन्न सचिवालय बैठकले प्रतिनिधि सभामा संसदीय दलका नेताले व्यक्त गरेको अभिव्यक्तिबारे विस्तृत छलफल गर्दै यस्तो धारणा सार्वजनिक गरेको हो।
बैठकपछि जानकारी दिँदै उपमहासचिव लेखराज भट्टले उक्त विषयमा गम्भीर समीक्षा गरिएको र त्यस सन्दर्भमा पार्टीको आधिकारिक धारणा स्पष्ट पारिएको बताए।
हालै प्रतिनिधि सभामा गरिएको सम्बोधनका क्रममा उठाइएका केही अभिव्यक्तिहरूलाई लिएर पार्टीभित्रै विभिन्न प्रतिक्रिया आएका थिए। सो विषयमा बैठकले समग्र रूपमा समीक्षा गरेको जनाइएको छ।
बैठकले संविधान र प्रचलित कानुनअनुसार सञ्चालित सुरक्षा निकाय, प्रशासनिक संयन्त्र तथा अन्तर्राष्ट्रिय समुदायसँग पार्टीको सम्बन्ध सकारात्मक रहेको पुनः दोहोर्याउँदै भविष्यमा त्यसलाई अझ सुदृढ बनाउने प्रतिबद्धता व्यक्त गरेको छ।
