काठमाडौँ । इरानी प्रशासनको नियन्त्रणमा रहेका नेपाली नागरिक अमृत झा सुरक्षित रहेको जानकारी परराष्ट्र मन्त्रालयले सार्वजनिक गरेको छ।
मन्त्रालयका प्रवक्ता लोकबहादुर क्षेत्रीका अनुसार ३३ वर्षीय झा हाल इरानस्थित कारागारमा रहेका छन्। उनीमाथि सम्बन्धित जिल्ला अदालतमा मुद्दा विचाराधीन रहेको जनाइएको छ।
मन्त्रालयले दिएको जानकारी अनुसार, झालाई मध्यपूर्व क्षेत्रमा पछिल्लो समय देखिएको तनावभन्दा अघि नै नियन्त्रणमा लिइएको थियो। यसकारण उनको मुद्दा हालको द्वन्द्वसँग प्रत्यक्ष रूपमा सम्बन्धित नभएको स्पष्ट गरिएको छ।
प्रवक्ता क्षेत्रीले कानुनी प्रक्रिया चलिरहेको अवस्थाका कारण तत्काल थप कूटनीतिक पहल गर्न कठिनाइ रहेको उल्लेख गर्दै, सम्बन्धित निकायसँग निरन्तर समन्वय भइरहेको बताए।
झा महोत्तरी जिल्लाका स्थायी बासिन्दा भई उदयपुरको त्रियुगा नगरपालिका-११ मा बसोबास गर्दै आएका थिए। उनी करिब दुई वर्षअघि वैदेशिक रोजगारीका लागि दुबई गएका थिए। तेल ढुवानी गर्ने जहाजमा क्याप्टेनका रूपमा कार्यरत उनले यसअघि पनि कामका सिलसिलामा इरान आवतजावत गर्ने गरेका थिए।
