काठमाडौं । संघीय संसदअन्तर्गत प्रतिनिधि सभाको चालु अधिवेशनको पहिलो बैठक आज बिहीबार दिउँसो २ बजे बस्ने भएको छ। बैठक सिंहदरबारस्थित निर्माणाधीन नयाँ संसद भवनको बहुउद्देश्यीय हलमा आयोजना गरिनेछ।
बैठकमा प्रतिनिधि सभामा प्रतिनिधित्व गर्ने ६ वटा राष्ट्रिय दलका शीर्ष नेताहरूले सम्बोधन गर्ने कार्यसूची तय गरिएको संघीय संसद सचिवालयले जनाएको छ। सम्बोधन गर्ने नेताहरूमा राष्ट्रिय स्वतन्त्र पार्टीका सभापति रवि लामिछाने, नेपाली काँग्रेसका सांसद भीष्मराज आङ्देम्बे, नेकपा एमालेका संसदीय दलका नेता रामबहादुर थापा, नेकपाका नेता वर्षमान पुन, श्रम संस्कृति पार्टीका अध्यक्ष हर्कराज राई तथा राष्ट्रिय प्रजातन्त्र पार्टीका संसदीय दलका नेता ज्ञानबहादुर शाही रहेका छन्।
यसैगरी, स्वतन्त्र सांसद महावीर पुनले पनि बैठकमा सम्बोधन गर्नेछन्। सचिवालयका अनुसार सबै दललाई दलगत आधारमा बोल्ने समय निर्धारण गरिएको छ। रास्वपालाई २५ मिनेट, काँग्रेसलाई १० मिनेट, एमालेलाई ८ मिनेट, नेकपा, श्रम संस्कृति पार्टी र राप्रपालाई ७–७ मिनेट तथा स्वतन्त्र सांसद पुनलाई ५ मिनेटको समय छुट्याइएको छ।
बैठकको सम्भावित कार्यसूचीमा राष्ट्रपति कार्यालयबाट प्राप्त पत्र वाचन, तीनवटा अध्यादेश पेश, सभामुख चयनका लागि निर्वाचन कार्यतालिका प्रस्तुति, संसद नियमावली २०७९ पेश तथा शोक प्रस्ताव पारित गर्ने कार्यक्रम समावेश छन्।
