काठमाडौँ । नेपाली काँग्रेसभित्रको असन्तुष्ट समूहले समानान्तर गतिविधि सुरु गरेपछि पार्टीका वरिष्ठ पदाधिकारीहरू आन्तरिक छलफलमा जुटेका छन्।
निवर्तमान कार्यवाहक सभापति पूर्णबहादुर खड्काले १४औँ महाधिवेशनबाट निर्वाचित केन्द्रीय कार्यसमितिको बैठक भोलिका लागि बोलाएपछि सभापति गगन थापासहितका पदाधिकारी अहिले सानेपास्थित पार्टी केन्द्रीय कार्यालयमा छलफलमा सहभागी भएका छन्।
पूर्वगृहमन्त्री रमेश लेखक पक्राउ परेपछि खड्काले कार्यवाहक सभापतिको हैसियतमा वक्तव्य जारी गर्दै शेरबहादुर देउवा निकटका जिल्ला सभापतिहरूको भेला समेत आयोजना गरेका थिए।
असन्तुष्ट समूहको सक्रिय समानान्तर गतिविधि देखिएपछि पार्टी नेतृत्वले यसबारे आन्तरिक विचारविमर्श गर्ने उद्देश्यले छलफल सुरु गरेको हो।
छलफलमा सहभागी एक पदाधिकारीले संक्षिप्त प्रतिक्रिया दिँदै भने, “यो औपचारिक बैठक होइन, अनौपचारिक छलफल हो।”
