काठमाडौँ । नेपाली काँग्रेसभित्र देखिएको आन्तरिक विवादबीच पार्टीका पूर्वकार्यवाहक सभापति पूर्णबहादुर खड्काले छुट्टै सक्रियता अघि बढाएका छन्।
पार्टीको आधिकारिकता सम्बन्धी विषय सर्वोच्च अदालतमा विचाराधीन रहेकै अवस्थामा उनले जिल्ला तहका नेतृत्वसँग छलफलका लागि भेला आह्वान गरेका हुन्।
पार्टी स्रोतका अनुसार चैत १९ गते धुम्बराहीस्थित एक पार्टी प्यालेसमा जिल्ला सभापतिहरूको बैठक बस्ने तयारी गरिएको छ। त्यसअघि चैत १७ र १८ गते १४औँ महाधिवेशनबाट निर्वाचित केन्द्रीय समितिका सदस्यहरूको बैठकसमेत आयोजना गर्ने योजना रहेको जनाइएको छ।
पछिल्लो निर्वाचनमा पार्टीले अपेक्षा अनुसार परिणाम ल्याउन नसकेपछि आन्तरिक असन्तोष बढ्दै गएको छ। सभापति गगन थापाको नेतृत्वमा पार्टी कमजोर प्रदर्शन गरेको भन्दै अर्को पक्षले आलोचना गर्दै समानान्तर गतिविधि विस्तार गरेको देखिन्छ।
यसअघि पनि खड्काको पहलमा डा. शेखर कोइरालालगायत नेताहरू सहभागी हुने छुट्टाछुट्टै बैठकहरू हुँदै आएका थिए। गुटगत सक्रियता बढेपछि पार्टीभित्र अनुशासन कायम गर्ने उद्देश्यले केन्द्रीय अनुशासन समितिले समेत बैठक बोलाएको छ।
