काठमाडौं– नेपाली कांग्रेसका महामन्त्री प्रदीप पौडेलले भदौ २३ र २४ गतेका घटनासम्बन्धी जाँचबुझ आयोगको प्रतिवेदन तत्काल सार्वजनिक गर्न सरकारसँग माग गरेका छन्।
बुधबार सानेपास्थित पार्टी कार्यालयमा सञ्चारकर्मीसँग कुरा गर्दै उनले आयोगले प्रतिवेदन बुझाइसके पनि हालसम्म सार्वजनिक नगरेकोप्रति असन्तुष्टि जनाए। प्रतिवेदन सार्वजनिक गर्न ढिलाइ हुँदा विभिन्न आशंका उत्पन्न भइरहेको उनको भनाइ थियो।
पौडेलले वर्तमान सरकारको म्यान्डेटमा निर्वाचन सम्पन्न गर्नु र ती घटनाको छानबिन गर्नु समेत समावेश रहेको उल्लेख गर्दै प्रतिवेदन सार्वजनिक नगर्नुले पारदर्शितामाथि प्रश्न उठ्ने बताए। उनले आयोगले घटनाको गहिरो अनुसन्धान गरेको विश्वास व्यक्त गर्दै दोषी देखिएकामाथि आवश्यक कारबाही गर्नुपर्ने धारणा राखे।
उनले प्रतिवेदन सार्वजनिक नभएसम्म अनावश्यक अनुमान र अड्कलबाजी बढ्ने भएकाले यस्ता परिस्थिति सिर्जना हुन नदिन सरकारलाई आग्रह गरे।
यसैगरी, पौडेलले भ्रष्टाचार नियन्त्रण, सुशासन प्रवर्द्धन तथा विद्यमान कानुन संशोधनका लागि बन्ने नयाँ सरकारलाई आफ्नो पार्टीले पूर्ण सहयोग गर्ने बताए।
साथै, लिपुलेक र लिम्पियाधुरा सम्बन्धी विषयलाई दीर्घकालीन रूपमा समाधान गर्न राज्यले कूटनीतिक पहल गर्नुपर्ने आवश्यकता औंल्याए।
