काठमाडौँमा फागुन २१ गते सम्पन्न प्रतिनिधिसभा सदस्य निर्वाचनबाट निर्वाचित सांसदहरूमध्ये ज्येष्ठ सदस्य अर्जुननरसिंह केसीले पद तथा गोपनीयताको शपथ लिएका छन्।
बुधबार बिहान राष्ट्रपति भवन शीतल निवासमा आयोजित विशेष समारोहमा उनले राष्ट्रपतिसमक्ष शपथ ग्रहण गरेका हुन्। उक्त कार्यक्रममा उपराष्ट्रपति रामसाहाय प्रसाद यादव, प्रधानन्यायाधीश प्रकाशसिंह राउत, राष्ट्रिय सभाका अध्यक्ष नारायणप्रसाद दाहाल, विभिन्न संवैधानिक निकायका प्रमुख, कूटनीतिक प्रतिनिधिहरू तथा उच्च पदस्थ सरकारी अधिकारीहरूको उपस्थिति रहेको थियो।
यस प्रतिनिधिसभा निर्वाचनमा प्रत्यक्ष प्रणालीतर्फ १६५ र समानुपातिक प्रणालीतर्फ ११० जना सांसद निर्वाचित भएका छन्। नेपाली कांग्रेसका केसी समानुपातिक प्रणालीमार्फत प्रतिनिधिसभामा प्रवेश गरेका हुन्।
ज्येष्ठ सदस्य केसीले चैत १२ गते बिहीबार प्रतिनिधिसभाका सबै नवनिर्वाचित सांसदहरूलाई पद तथा गोपनीयताको शपथ गराउने कार्यक्रम तय गरिएको छ।
