काठमाडौँ । जिल्ला प्रहरी कार्यालय सिरहाले लागूऔषध नियन्त्रण अभियान अन्तर्गत खैरो हेरोइनजस्तो देखिने पदार्थसहित दुई जनालाई नियन्त्रणमा लिएको छ।
गोलबजार नगरपालिका-४ स्थित निपाने टोलमा विशेष सूचनाका आधारमा परिचालन गरिएको प्रहरी टोलीले स्थानीय अनिल चौधरीलाई शंकास्पद अवस्थामा फेला पारी नियन्त्रणमा लिएको हो। प्रारम्भिक जाँचका क्रममा उनको साथबाट करिब १ ग्राम जस्तो देखिने लागूऔषधजन्य पदार्थ बरामद गरिएको प्रहरीले जनाएको छ।
घटनासँग सम्बन्धित थप अनुसन्धानका क्रममा सोही प्रकरणमा संलग्न रहेको आशंकामा बलिराम महतोलाई समेत प्रहरीले नियन्त्रणमा लिएको छ। महतोको निवासमा गरिएको खानतलासीबाट थप १०.२५ ग्राम लागूऔषध फेला परेको प्रहरीको भनाइ छ।
प्रहरीका अनुसार दुवै व्यक्तिबाट नगद रकम, मोबाइल फोन, सुई तथा लाइटरलगायत सामग्री पनि बरामद गरिएको छ। पक्राउ परेकामाथि लागूऔषध सम्बन्धी प्रचलित कानुन अनुसार मुद्दा दर्ता गरी थप अनुसन्धान अघि बढाइएको जिल्ला प्रहरी कार्यालय सिरहाले जनाएको छ।
