काठमाडौँ । संघीय निकायअन्तर्गत रहेको पर्यटन क्षेत्रको अभिलेखअनुसार मुलुकभर दर्ता भएका होटेल तथा रिसोर्टको संख्या ३ सय ४९ पुगेको छ।
पर्यटन विभागले मंगलबार सार्वजनिक गरेको विवरणमा देशभरका यी आवास संरचनामा कुल १६ हजार ३ सय ५० कोठा र २५ हजार ८ सय ८१ शय्या उपलब्ध रहेको उल्लेख छ। यस आधारमा पर्यटक स्तरका होटेलहरूले एकै समयमा झण्डै २५ हजार ८ सयभन्दा बढी पाहुनालाई सेवा दिन सक्ने क्षमता देखिएको छ।
विभागको तथ्यांकअनुसार पाँचतारे स्तरका होटेल २८ वटा रहेका छन्, जसमा ३ हजार ६ सयभन्दा बढी कोठा र करिब ५ हजार ३ सय शय्या छन्। चारतारे होटेलको संख्या ४० पुगेको छ भने तीन तारे होटेल ३७ वटा रहेका छन्। त्यस्तै दुईतारे र एकतारे होटेल क्रमशः ४९ र ४४ वटा दर्ता भएका छन्।
उच्चस्तरीय विशेष संरचनामा पाँचतारे डिलक्स, लक्जरी बुटिक तथा हेरिटेज होटेलहरू पनि समावेश छन्। यसअन्तर्गत डिलक्स श्रेणीका तीनवटा, लक्जरी बुटिक तथा हेरिटेज प्रकारका तीनवटा, चारतारे स्तरका डिलक्सरहेरिटेज पाँचवटा तथा तीन तारे स्तरको नर्मल हेरिटेज बुटिक एकवटा रहेको विवरणमा उल्लेख छ।
यसैगरी रिसोर्टतर्फ साधारण, डिलक्स र लक्जरी गरी विभिन्न श्रेणीमा १ सय २७ साधारण रिसोर्ट, ९ डिलक्स रिसोर्ट र ३ लक्जरी रिसोर्ट दर्ता भएका छन्।
विभागका अनुसार हाल कार्यान्वयनमा रहेको वर्गीकरण मापदण्ड २०७६ सालको हो र समयसापेक्ष सुधारको आवश्यकता देखिएकाले नयाँ मापदण्ड तयार गर्ने प्रक्रिया अघि बढाइएको छ। सोही सन्दर्भमा सरोकारवालासँग सुझाव संकलन गरिएको छ।
विभागले विद्यमान मापदण्डमा सुधार गर्नुपर्ने पक्ष, वातावरणमैत्री तथा दिगो पर्यटन प्रवर्द्धनका लागि आवश्यक सूचकहरू, साथै होटेलहरूको पूर्वाधार र सेवा गुणस्तरको पुनः मुल्यांकनसम्बन्धी विषयमा राय-सुझाव माग गरेको जनाएको छ। नयाँ मापदण्डमा ‘ग्रिन हस्पिटालिटी’ अवधारणालाई समेत समावेश गर्ने तयारी गरिएको छ, जसले दिगो विकास र पर्यावरणीय सचेतनालाई प्राथमिकतामा राख्ने अपेक्षा गरिएको छ।
