काठमाडौँ । नेपाली काँग्रेसका सभापति गगन कुमार थापाले आफ्नो राजीनामा आकस्मिक वा दबाबमा परेर नभएको स्पष्ट पारेका छन्।
केन्द्रीय कार्यसमिति बैठकमा सम्बोधन गर्दै उनले राजीनामा दिने निर्णय व्यक्तिगत मनस्थिति र जिम्मेवारी बोधका आधारमा गरिएको बताए।
उनका अनुसार विशेष महाधिवेशनपछि नेतृत्व सम्हालेर निर्वाचनमा गएको र त्यसपछि देखिएको परिणामलाई ध्यानमा राख्दै उनले जबाफदेहीताका आधारमा पद त्याग गर्ने निर्णय गरेका हुन्।
थापाले निर्वाचन सम्पन्न भएपछि तत्काल राजीनामा दिने सोच भए पनि निर्वाचनसम्बन्धी औपचारिक प्रक्रिया सम्पन्न गर्नुपर्ने भएकाले निर्णय केही समय पर धकेलिएको उल्लेख गरे। उनले पार्टीभित्र तथा बाहिर उठेका विभिन्न टिप्पणीहरूलाई आफ्नो प्रत्यक्ष सरोकारको विषय नमान्ने धारणा पनि व्यक्त गरे।
उनका अनुसार आफूले उपसभापति समक्ष आफ्नो मनस्थिति पहिल्यै साझा गरेको र त्यसपछि औपचारिक रूपमा राजीनामा प्रस्तुत गरिएको हो। निर्णय कुनै बाह्य दबाबमा नभई आन्तरिक उत्तरदायित्वका आधारमा गरिएको उनले दोहोर्याए।
साथै, निर्वाचनपछि पार्टी प्रमुख प्रतिपक्षको भूमिकामा पुगेको उल्लेख गर्दै उक्त जिम्मेवारीलाई प्रभावकारी रूपमा निर्वाह गर्नुपर्ने आवश्यकता रहेको उनले औँल्याए।