काठमाडौँ । गैरआवासीय नेपाली संघ (एनआरएनए) को अन्तर्राष्ट्रिय समन्वय परिषद् (आइसिसी) अन्तर्गत २०२६-२०२८ कार्यकालका लागि मध्यपूर्व क्षेत्रीय संयोजक पदमा युएईमा क्रियाशील रमेश श्रेष्ठ पुनः चयन भएका छन्।
दीर्घकालदेखि युएईसहित मध्यपूर्व क्षेत्रमा व्यावसायिक र सामाजिक गतिविधिमा संलग्न श्रेष्ठलाई संगठनभित्र अनुभवी तथा परिणाममुखी नेतृत्वका रूपमा हेरिँदै आएको छ। उनी जिसिडी समूहका अध्यक्ष समेत हुन्।
संगठनमा उनको सहभागिता साधारण सदस्यबाट सुरु भई एनसीसी युएईको अध्यक्ष, त्यसपछि क्षेत्रीय समन्वय संरचनामार्फत अन्तर्राष्ट्रिय तहसम्म विस्तार भएको देखिन्छ।
निर्वाचनपछि सार्वजनिक गरिएको धारणा अनुसार उनले मध्यपूर्वमा कार्यरत नेपाली श्रमिकको अधिकार, सुरक्षा र हित संरक्षणलाई प्राथमिकतामा राख्ने बताएका छन्। साथै, हाल क्षेत्रीय अस्थिरताबाट प्रभावित कामदारलाई लक्षित गर्दै तत्काल उद्धार, राहत तथा सहयोग सुनिश्चित गर्न आपतकालीन राहत कोष स्थापना गर्ने योजना अघि सारेका छन्।
उक्त कोषमार्फत दुर्घटना, स्वास्थ्य समस्या, कानुनी जटिलता वा अन्य संकटमा परेका नेपालीलाई छिटो तथा प्रभावकारी सहयोग उपलब्ध गराउने लक्ष्य राखिएको जनाइएको छ।
