काठमाडौँ । अमेरिकी राष्ट्रपति डोनाल्ड ट्रम्पले मध्यपूर्वमा जारी द्वन्द्व पूर्ण रूपमा अन्त्य गर्न वार्ता भएको बताएका छन् । उनले ‘पूर्ण समाधान’का बारे ‘सकारात्मक छलफल’ भएको दाबी गरेका छन् ।
ट्रम्पले इरानको विद्युत केन्द्र र ऊर्जा पूर्वाधारमा हुने कुनै पनि आक्रमण पाँच दिनको लागि स्थगित गरिएको पनि बताएका छन् ।
यसअघि, ट्रुथ सोसलमा एक पोस्टमा ट्रम्पले लेखेका थिए, ‘मलाई यो रिपोर्ट गर्न पाउँदा खुसी लागेको छ कि मध्यपूर्वमा द्वन्द्वको पूर्ण समाधानको बारेमा संयुक्त राज्य अमेरिका र इरानले विगत दुई दिनमा धेरै राम्रो र सकारात्मक छलफल गरेका छन् ।’
उनले लेखेका थिए, ‘हप्ताभरि जारी रहने यी रचनात्मक छलफलको अवधि र वातावरणलाई ध्यानमा राख्दै, मैले युद्ध विभागलाई इरानी पावर प्लान्ट र ऊर्जा पूर्वाधारमा सबै सैन्य आक्रमणहरू पाँच दिनको लागि स्थगित गर्न निर्देशन दिएको छु । यो निर्णय यी बैठकहरू र छलफलहरूको सफलतामा निर्भर हुनेछ।’
तर इरानले त्यस्तो कुनै पनि वार्ता अस्वीकार गरेको छ। इरानको विदेश मन्त्रालयले वार्तासम्बन्धी अमेरिकी राष्ट्रपति डोनाल्ड ट्रम्पको भनाइ अस्वीकार गरेको हो ।
बीबीसीको अमेरिकी साझेदार सीबीएस न्यूजका अनुसार, इरानको विदेश मन्त्रालयले प्रकाशन गरेको विज्ञप्तिमा भनिएको छ, ‘हामी अमेरिकी राष्ट्रपति डोनाल्ड ट्रम्पले अमेरिका र इरानबीच वार्ता भइरहेको भन्ने गरेको भनाइलाई अस्वीकार गर्छौँ ।’
इरान आफ्नो अडानमा प्रतिबद्ध रहेको र कुनै पनि वार्ता इरानको युद्धसँग सम्बन्धित उद्देश्यहरू पूरा भएपछि मात्र हुने बताइएको छ । इरानले अहिलेसम्म ट्रम्पसँग कुनै प्रत्यक्ष वा अप्रत्यक्ष सम्पर्क नभएको जनाएको छ ।
