काठमाडौँ । विदेशमा बसोबास गर्ने नेपाली मूलका व्यक्तिहरू र गैरआवासीय नेपालीलाई लक्षित गर्दै त्रिभुवन अन्तर्राष्ट्रिय विमानस्थलमा अध्यागमन सेवाका लागि छुट्टै डेस्क सञ्चालनमा ल्याइएको छ।
अध्यागमन कार्यालयका अनुसार आगमन तथा प्रस्थान दुवै खण्डमा विशेष काउन्टर स्थापना गरी सेवा प्रवाह सुरु गरिएको हो। यसअघि गैरआवासीय नेपाली संघ (एनआरएनए) सम्बद्ध व्यक्तिहरू तथा भिसा नलाग्ने मुलुकका यात्रुहरूका लागि मात्र छुट्टै व्यवस्था रहेकोमा अब त्यसलाई विस्तार गर्दै नेपाली मूलका विदेशी नागरिकलाई समेत समेटिएको छ।
कार्यालयका अनुसार यो व्यवस्था कार्यान्वयनमा आएपछि सेवा प्राप्तिमा सहजता आउने अपेक्षा गरिएको छ। नेपाली भाषा, संस्कृतिसँगको सम्बन्ध मजबुत बनाउने तथा पर्यटन र लगानी प्रवर्द्धनलाई प्रोत्साहन गर्ने उद्देश्यले यस्तो कदम चालिएको जनाइएको छ।
अध्यागमन विभाग को चैत ८ गतेको निर्णयअनुसार लागू गरिएको यस व्यवस्थाबारे अध्यागमन कार्यालयले सार्वजनिक सूचना जारी गर्दै विमानस्थलमा छुट्टै लाइनसहित सेवा उपलब्ध गराइएको जानकारी दिएको छ।
