काठमाडौँ । वन तथा वातावरण मन्त्रालयले चालु आर्थिक वर्षमा वन डढेलोका घटनाहरू तुलनात्मक रूपमा न्यून हुन सक्ने आँकलन सार्वजनिक गरेको छ।
मन्त्रालयका सचिव गोविन्दप्रसाद शर्माले हालको मौसमी अवस्थाका आधारमा डढेलोको जोखिम घट्ने संकेत देखिएको बताएका हुन्।
सोमबार राजधानीमा आयोजित एक कार्यक्रममा बोल्दै उनले यस वर्ष भएको हिउँदे वर्षातलाई प्रमुख कारणका रूपमा उल्लेख गरे। उनका अनुसार वर्षातका कारण वन क्षेत्रमा रहेका सुख्खा पातपतिंगरहरू कुहिने प्रक्रियामा गएकाले प्राकृतिक रूपमा आगलागी हुने सम्भावना घटेको छ।
सचिव शर्माले यद्यपि आकस्मिक आगलागीका घटनाबाट हुन सक्ने क्षति न्यूनीकरणका लागि सम्बन्धित निकायहरू सतर्क रहन आवश्यक रहेको बताए। उनले डढेलो नियन्त्रण र रोकथामका उपायहरूमा थप ध्यान दिनुपर्नेमा जोड दिए।
यसका साथै वन डढेलोसम्बन्धी जनचेतना अभिवृद्धि गर्न तथा प्रभावकारी व्यवस्थापनका लागि थप अध्ययन तथा अनुसन्धान आवश्यक रहेको उनले औँल्याएका छन्।
