काठमाडौँ । नवनिर्वाचित प्रतिनिधि सभाका सदस्यहरूले शपथ ग्रहणका क्रममा मातृभाषा प्रयोग गर्न पाउने प्रावधान राखिएको छ।
यसका लागि शपथ लिनुभन्दा कम्तीमा तीन दिनअघि संघीय संसद् सचिवालयलाई सम्बन्धित भाषा बारे जानकारी गराउनुपर्ने व्यवस्था गरिएको छ।
प्रचलित शपथसम्बन्धी ऐन २०७९अनुसार सामान्यतः शपथ नेपाली भाषामा लिनुपर्ने भए पनि इच्छुक सदस्यहरूले मातृभाषामा शपथ लिन सक्नेछन्। तर त्यसका लागि शपथको प्रमाणित अनुवाद अनिवार्य रूपमा पेश गर्नुपर्ने उल्लेख गरिएको छ।
साथै, शपथ ग्रहणका बेला सदस्यहरूले आफ्नो सांस्कृतिक वा पहिचान झल्किने औपचारिक पोसाक लगाउन सक्ने प्रावधान पनि रहेको छ।
निर्धारित कार्यक्रम अनुसार ज्येष्ठ सदस्यले चैत ११ गते राष्ट्रपति समक्ष शपथ लिनेछन् भने त्यसपछि अन्य सदस्यहरूलाई शपथ गराइनेछ। नवनिर्वाचित प्रतिनिधि सभा सदस्यहरूको सामूहिक शपथ कार्यक्रम चैत १२ गतेका लागि तय गरिएको छ।
