काठमाडौं । इजरायलको दक्षिणी सहर अरादमा भएको इरानी मिसाइल हमलाले भयावह रूप लिएको छ । स्थानीय दमकल विभागका अनुसार, मिसाइल सहरको बीचभागमा खसेको थियो, जसका कारण सिटी सेन्टर र आसपासका आवासीय क्षेत्रमा ठूलो क्षति पुगेको छ । घटनास्थलमा उद्धार र राहत कार्य जारी छ ।
आक्रमणपछि इजरायल सरकारले अरादमा संकटकाल घोषणा गरेको छ । सञ्चारमाध्यमका अनुसार, यस हमलामा कम्तीमा ८८ जना घाइते भएका छन् । इजरायली आपत्कालीन सेवाले घाइतेहरूको उपचार भइरहेको र एक पाँच वर्षीया बालिकाको अवस्था गम्भीर रहेको जनाएको छ । मिसाइल बाक्लो बस्ती भएको इलाकामा खसेकाले धेरै भवनहरू ध्वस्त भएका छन् । स्थानीय प्रशासनले सबै नागरिकलाई सुरक्षित स्थानमा रहन अपिल गरेको छ ।
इरानको दाबी : इजरायलको आकाश सुरक्षित छैन
इरानी संसद्का सभामुख मोहम्मद–बाकर गालिबाफले सामाजिक सञ्जाल एक्समार्फत डिमोनामा हालै भएका मिसाइल हमलाहरूले इजरायलको हवाई सुरक्षा प्रणाली कमजोर हुँदै गएको प्रमाणित गरेको बताएका छन् । उनले अब इजरायलको आकाश सुरक्षित नरहेको र युद्ध नयाँ चरणमा प्रवेश गरेको दाबी गरेका छन् ।
यसैबीच इजरायली स्वास्थ्य मन्त्रालयका अनुसार, युद्ध सुरु भएयता इजरायलमा चार हजार २९२ भन्दा बढी मानिस घाइते भई अस्पताल पुगिसकेका छन् ।
हिजबुल्लाहको दाबी
यसैबीच लेबनानी सशस्त्र समूह हिजबुल्लाहले उसका लडाकुहरूले सीमानजिकै इजरायली सैनिक र सैन्य सवारीसाधनहरूलाई निसाना बनाएको दाबी गरेका छन् । संगठनका अनुसार, मार्काबा इलाकामा गस्ती गरिरहेका सैनिकहरूमाथि रकेट प्रहार गरिएको छ । यसका साथै अल अदाइसेह सीमा क्षेत्रमा पनि इजरायली सैनिक र सवारी साधनहरूमाथि हमला गरिएको हिजबुल्लाहले जनाएको छ ।
ट्रम्पको ४८ घण्टे अल्टिमेटम
अमेरिकी राष्ट्रपति डोनाल्ड ट्रम्पले इरानलाई लिएर कडा चेतावनी जारी गरेका छन् । आफ्नो सोसल मिडिया प्लेटफर्म ’ट्रुथ सोसल’ मा पोस्ट गर्दै उनले भने, “यदि इरानले ४८ घण्टाभित्र हर्मोज जलमार्ग बिनाकुनै सर्त पूर्ण रूपमा नखोले अमेरिकाले कडा सैन्य कारबाही गर्नेछ ।”
ट्रम्पले यसो नभएमा अमेरिकाले इरानका पावर प्लान्टहरूलाई निसाना बनाउने र यो कारबाही सबैभन्दा ठूलो प्लान्टबाट सुरु हुने चेतावनी दिएका छन्
