काठमाडौँ– पश्चिम एसियाको युद्धका कारण केन्द्रबिन्दु बनेको होर्मुज जल क्षेत्रमा काम गर्दै आएका उदयपुरको गाइघाटका ३० वर्षीय अमृत झा इरानी सेनाको कब्जामा परेका छन् ।
परराष्ट्र मन्त्रालयको पश्चिम एसिया महाशाखाका प्रमुख एवम् सहसचिव रामकाजी खड्काले होर्मुजको जलघाटी क्षेत्रबाट उनलाई इरानी सेनाले नियन्त्रणमा लिएको पुष्टि गरेका छन् ।
इरानमा तेल लिन जाने क्रममा हर्मुज क्षेत्रको बन्दर अब्बास बन्दरगाहमा उनलाई इरानी सेनाले नियन्त्रण लिएको बताइएको छ ।
अमृत दुई वर्षअघि कामको सिलसिलामा दुबई गएका थिए । उनी त्यहाँस्थित ब्ल्याक सी मरिन एलएलसी कम्पनीमा पानी जहाजमा काम गर्दै आएका थिए । उनी पानी जहाज चालक दलका सदस्य रहेको पुष्टि भएको छ ।
