दोहा – इरानले गरेको पछिल्लो क्षेप्यास्त्र प्रहारबाट कतारको मुख्य औद्योगिक क्षेत्रमा ठूलो क्षति भएको छ।
बिबिसीका अनुसार ‘रास लाफान’मा व्यापक क्षति पुगेको हो। कतारको सरकारी पेट्रोलियम कम्पनीका अनुसार ग्यास क्षेत्रमा भएको इजरायली हमलाको बदला लिन इरानले यो आक्रमण गरेको हो।
इरानको ‘साउथ पार्स’ ग्यास क्षेत्रमा इजरायलले आक्रमण गरेपछि तेहरानले ‘निर्णायक कदम’ चाल्ने चेतावनी दिएको थियो। सोही क्रममा रास लाफानलाई निशाना बनाइएको अन्तर्राष्ट्रिय सञ्चार माध्यमले जनाएका छन्।
साउथ पार्स विश्वकै ठूलो प्राकृतिक ग्यास भण्डारको हिस्सा हो, जहाँ कतार र इरान दुवैका प्रशोधन केन्द्र सञ्चालित छन्। यो आक्रमणका विषयमा इजरायलले कुनै प्रतिक्रिया दिएको छैन।
अमेरिका, इजरायल र इरानी आक्रमणले मध्यपूर्वको तनाव उत्कर्षमा पुगेको छ।
यो युद्धको मारमा दुबई, कतार, कुवेत, इराक, बहराइन र साउदी अरेबिया परेका छन् । अधिकांश नेपाली कामदार खाडी मुलुकमा भएकाले त्यहाँ हुने विष्फोटले नेपालीका घरघरमा त्रास बढ्दै गएको छ ।
मध्यपूर्वमा जारी यो शक्ति संघर्षले विश्वव्यापी ऊर्जा बजारमा गम्भीर चुनौती थपेको छ।
