काठमाडौँ। प्रधानमन्त्री सुशीला कार्कीले प्रवासी नेपालीलाई नेपालका विकास परियोजनामा र लगानीमा सहभागी हुन आह्वान गर्दै नेपालका आर्थिक समृद्धि र सामाजिक विकासमा उनीहरूको सक्रिय सहभागिता महत्वपूर्ण रहेको बताइन्।
गैरआवासीय नेपाली संघ (एनआरएनए)को १२औं महाधिवेशन र विश्व सम्मेलनको समापन समारोहलाई सम्बोधन गर्दै प्रधानमन्त्री कार्कीले प्रवासी नेपालीलाई नेपालको सद्भावना दूतको रूपमा चिनाउँदै, उनीहरूको योगदान र कार्यले नेपाललाई विश्वभर सकारात्मक छवि फैलाउन मद्दत पुर्याइरहेको उल्लेख गरिन्।
उनले भनिन्, “जहाँ पनि हुनुहुन्छ, तपाईंहरूले नेपालको गौरव, संस्कृति र पहिचानलाई विश्वसमक्ष चिनाउँदै आउनुभएको छ।”
प्रधानमन्त्री कार्कीले नेपालको संविधानले गैरआवासीय नेपालीलाई आर्थिक, सामाजिक र सांस्कृतिक अधिकारसहित नागरिकताको व्यवस्था गरेको कुरा स्मरण गर्दै भने, “यसले मातृभूमि र प्रवासीबीचको सम्बन्धलाई अझ सुदृढ बनाएको छ। यसले विदेशमा रहेका नेपालीलाई नेपालमा आफ्नो ज्ञान, सीप, अनुभव र पुँजी लगानी गर्ने अवसर पनि प्रदान गरेको छ।”
प्रधानमन्त्री कार्कीले सरकारको प्राथमिकतामा उत्पादनमूलक क्षेत्रका लागि वैदेशिक लगानी आकर्षित गर्ने, प्रवासी नेपालीको लगानीलाई सुरक्षित र पारदर्शी ढंगले परिचालन गर्ने र दीर्घकालीन लगानी संरचना निर्माण गर्ने नीति रहेको बताइन्। साथै, उनले प्रवासी नेपालीको लगानीले केवल आर्थिक समृद्धिमा मात्र नभई सामाजिक पुँजी निर्माणमा पनि महत्त्वपूर्ण योगदान पुर्याउने विश्वास व्यक्त गरिन्।
त्यस्तै, उनले एनआरएनए भित्रको विगतको विभाजन अन्त्य भई सबै एकै मञ्चमा उभिनु सकारात्मक भएको र सर्वसम्मत नेतृत्व चयनपछि एकताको सन्देश विश्वभरका नेपालीहरूको भावनात्मक एकताको आधार बन्नुपर्ने बताइन्।
