काठमाडौ– प्रतिनिधीसभा निर्वाचनका कारण स्थगित भएको नेपाल चिकित्सक संघ (एनएम) को केन्द्रीय कार्यकारिणी समितिको निर्वाचन प्रक्रिया पुनः अघि बढाउने तयारी सुरु भएको छ ।
यसका लागि निर्वाचन समितिले आगामी बुधबार उम्मेदवारहरूसँग छलफल गर्ने भएको छ ।
निर्वाचन समितिका प्रमुख निर्वाचन अधिकृत डा. प्रणय रत्न शाक्य का अनुसार २०८२ चैत ४ गते बिहान ११ बजे संघको केन्द्रीय कार्यालय, प्रदर्शनीमार्गमा सबै उम्मेदवार वा उनीहरूका प्रतिनिधिलाई छलफलका लागि बोलाइएको छ ।
छलफलमा स्थगित निर्वाचन कार्यक्रमलाई कसरी अगाडि बढाउने भन्ने विषयमा राय सुझाव लिइने जनाइएको छ ।
एनएमएको निर्वाचन यसअघि विभिन्न कारणले प्रभावित हुँदै आएको थियो । प्रारम्भमा केही उम्मेदवारले नियम विपरीत आफ्नो नाम अन्तिम नामावलीमा समावेश नगरिएको भन्दै अदालतमा उजुरी दिएका थिए ।
अदालतले उनीहरूको नामसमेत समावेश गर्न आदेश दिएपछि निर्वाचन प्रक्रिया अघि बढ्ने तयारी भएको थियो ।
तर त्यसको केही समयपछि निर्वाचन आयोग ले प्रतिनिधिसभा निर्वाचन का लागि जारी गरेको निर्वाचन आचारसंहिता लागू भएपछि संघको निर्वाचन कार्यक्रम सञ्चालन गर्न नमिल्ने अवस्था सिर्जना भएको थियो ।
आयोगले २०८२ माघ ७ गते पठाएको पत्रका आधारमा संघको निर्वाचन कार्यक्रम स्थगित गरिएको थियो ।
अब उक्त आचारसंहिताको अवधि समाप्त भइसकेपछि २०८२ फागुन ३० गते बसेको निर्वाचन समितिको बैठकले निर्वाचन प्रक्रिया पुनः अघि बढाउने विषयमा उम्मेदवारहरूसँग छलफल गर्ने निर्णय गरेको हो ।
समितिले सबै उम्मेदवार वा उनीहरूका प्रतिनिधिलाई तोकिएको मिति, समय र स्थानमा उपस्थित भई आवश्यक सुझाव दिन आग्रह गरेको छ ।
