काठमाडौँ। नेकपा (एमाले)का नेता सुरेन्द्र पाण्डेले पार्टीको वर्तमान संरचना र सञ्चालन शैलीलाई पुनरावलोकन गर्दै व्यापक सुधार गर्नुपर्ने अवस्था आएको बताएका छन्।
शनिबार सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले हालैको चुनावी परिणामपछि नेतृत्वको नैतिक आधार कमजोर बनेको टिप्पणी गरेका छन्। मतदाताले मतपत्रमार्फत असन्तुष्टि व्यक्त गरिसकेको अवस्थामा सत्य बोलेको आधारमा कार्यकर्तामाथि कारबाहीको चेतावनी दिनु उचित नहुने उनको भनाइ छ।
पाण्डेले ठूलो चुनावी पराजयपछि पनि नेतृत्वले आत्म समालोचना नगरी अरूमाथि दोषारोपण गर्नु उपयुक्त नहुने उल्लेख गरेका छन्। उनका अनुसार पार्टीको संरचना तथा कार्य पद्धतिलाई समग्र रूपमा ‘रिसेट’ गरेर नयाँ ढंगले अघि बढ्ने समय आएको छ।
उनले चुनावी नतिजालाई षड्यन्त्र वा अन्तर्घातका रूपमा व्याख्या गर्नु जनताको मतप्रतिको अनादर हुने बताएका छन्। केही स्थानमा अन्तर्घात भए पनि त्यसले सीमित मतान्तर मात्रै पार्न सक्ने उल्लेख गर्दै ठूलो मतान्तरलाई त्यही कारण देखाउनु यथार्थसँग मेल नखाने उनले बताएका छन्।
पाण्डेले वर्तमान परिस्थितिलाई कुनै षड्यन्त्रका रूपमा नभई पार्टीको सञ्चालन शैलीप्रति जनताले दिएको स्पष्ट सन्देशका रूपमा लिनुपर्ने बताएका छन्। यदि समयमै सुधार गर्ने साहस नगरी अरू असफल हुने प्रतीक्षामा बस्ने प्रवृत्ति कायम रहेमा त्यसले पार्टी र मुलुक दुवैका लागि नकारात्मक असर पार्न सक्ने उनको धारणा छ।
