काठमाडौँ। नेपाल आयल निगमले एलपी ग्यास उद्योग तथा वितरकलाई घरायसी प्रयोजनका उपभोक्तालाई प्राथमिकतामा राखेर ग्यास बिक्री गर्न निर्देशन दिएको छ।
निगमले देशभर सञ्चालनमा रहेका ग्यास उद्योगलाई आफ्ना उद्योगबाट वितरकलाई बिक्री गरिने ग्यासको परिमाण, वितरण हुने स्थान र सम्पर्क नम्बरसमेत उल्लेख गरी हरेक दिन बिहान १० बजेसम्म सार्वजनिक गर्न र सो विवरण निगमलाई उपलब्ध गराउन आग्रह गरेको छ।
त्यस्तै, विक्रेताहरूले उपभोक्तालाई बिक्री गरिएको ग्यासको विवरण-खरिदकर्ताको नाम, सम्पर्क नम्बर र परिमाण-रेकर्डका रूपमा राखी सम्बन्धित उद्योगमार्फत दैनिक रूपमा निगमलाई जानकारी गराउन पनि भनिएको छ।
निगमका अनुसार अर्को निर्णय नभएसम्म सबै ग्यास उद्योगहरूले सिलिन्डरमा ७.१ किलोग्राम एलपी ग्यास भरेर प्रतिसिलिन्डर ९५५ रुपैयाँमा बिक्री गर्ने व्यवस्था लागू गरिएको छ।
मध्यपूर्व क्षेत्रमा जारी द्वन्द्वका कारण अन्तर्राष्ट्रिय स्तरमा पेट्रोलियम पदार्थ तथा एलपी ग्यासको आपूर्तिमा असर परिरहेको भए पनि नेपालमा भने नियमित आपूर्ति सुनिश्चित गरी बिक्री भइरहेको निगमले जनाएको छ।
