काठमाडौँ । प्रतिनिधि सभा सदस्य उपनिर्वाचनअन्तर्गत महोत्तरी निर्वाचन क्षेत्र नं. ४ मा राष्ट्रिय स्वतन्त्र पार्टी (रास्वपा)की उम्मेदवार गौरी कुमारी विजयी भएकी छन्।
उनले जनता समाजवादी पार्टी (जसपा) नेपालका उम्मेदवार सुरेन्द्रकुमार यादवलाई पराजित गर्दै विजय हासिल गरेकी हुन्।
निर्वाचन अधिकृतका अनुसार विजयी गौरी कुमारीले ३० हजार १३२ मत प्राप्त गरिन्। उनका निकटतम प्रतिद्वन्द्वी जसपा नेपालका यादवले ८ हजार ७४२ मत पाए।
यस्तै नेपाली काँग्रेसका महेन्द्रकुमार राय ६ हजार ९४४ मतसहित तेस्रो स्थानमा रहे भने नेकपा (एमाले)की निलम अधिकारीले ६ हजार १९२ मत प्राप्त गरिन्। नेपाल कम्युनिस्ट पार्टी (नेकपा)का भरतप्रसाद साहले ५ हजार ३३६ मत प्राप्त गरेका छन्।
