काठमाडौं । मध्यपूर्वमा जारी भिषण सैन्य द्वन्द्वका कारण विश्व बजारमा ऊर्जा (तेल र ग्यास) को मूल्यमा सोमबार तीव्र वृद्धि भएको छ । तेल उत्पादनको केन्द्र मानिने यस क्षेत्रमा जारी तनावले विश्वव्यापी आपूर्ति प्रणाली नै ठप्प हुन सक्ने जोखिम बढेपछि इन्धनको मूल्य आकाशिएको हो ।
अन्तर्राष्ट्रिय बजारको मानक मानिने ‘ब्रेन्ट क्रुड’ को मूल्य १.९ प्रतिशतले बढेर प्रतिब्यारेल ७९.२५ अमेरिकी डलर पुगेको छ । त्यसैगरी, अमेरिकी बजारमा कारोबार हुने कच्चा तेलको मूल्यमा पनि करिब १.५ प्रतिशतको बढोत्तरी देखिएको छ । गत सप्ताहान्तदेखि अमेरिका र इजरायलले इरानमाथि आक्रमण सुरु गरेसँगै विश्वभर पेट्रोलियम पदार्थको मूल्यमा यो उछाल आएको हो ।
तेलसँगै प्राकृतिक ग्यासको मूल्यमा पनि सोमबार ठूलो वृद्धि भएको छ । विश्वकै ठूलो ग्यास निर्यातकर्तामध्येको एक ‘कतार इनर्जी’ले आफ्ना उत्पादन केन्द्रहरूमा ‘सैन्य आक्रमण’ भएको भन्दै उत्पादन पूर्ण रूपमा बन्द गरेपछि बजारमा ग्यासको अभाव देखिन थालेको हो ।
कतारले सुरक्षा संवेदनशीलताका कारण उत्पादन र आपूर्ति रोकेपछि युरोप र एसियाली मुलुकहरूमा ग्यासको मूल्यमा चाप पर्ने देखिएको छ । मध्यपूर्वको यो अस्थिरताले विश्व अर्थतन्त्रलाई नै महँगीको नयाँ चपेटामा पार्ने संकेत गरेको छ ।
