काठमाडौँ । नेपाली काँग्रेसले निर्वाचन प्रचारप्रसारका क्रममा आचारसंहिता विपरीत गतिविधि भइरहेको भन्दै निर्वाचन आयोगको ध्यानाकर्षण गराएको छ ।
आइतबार पार्टीका प्रवक्ता तथा केन्द्रीय प्रचार–प्रसार समिति संयोजक देवराज चालिसे नेतृत्वको टोलीले आयोगमा पुगेर लिखित ज्ञापन पत्र बुझाएको हो । उक्त पत्रमा आचारसंहिता उल्लंघन गर्ने व्यक्ति वा दललाई कानुनी दायरामा ल्याउन माग गरिएको छ ।
काँग्रेसका अनुसार केही राजनीतिक दलहरूले भौतिक चुनाव चिह्नको सार्वजनिक प्रदर्शन तथा दुरुपयोग गरिरहेका छन् । साथै प्रचार कार्यक्रममा बालबालिकाको संलग्नता समेत देखिएको उल्लेख गरिएको छ । विशेष गरी राष्ट्रिय स्वतन्त्र पार्टीको प्रचार अभियानका क्रममा ‘घण्टी’ चिह्न प्रयोग भएको विषयमा आयोगले यसअघि नै भौतिक चुनाव चिह्न प्रदर्शन नगर्न आग्रह गरिसकेको स्मरण गराइएको छ ।
प्रतिनिधि सभा निर्वाचन नजिकिँदै गर्दा केही दलहरूले स्वच्छ प्रतिस्पर्धाभन्दा बाहिर गएर प्रचार गतिविधि गरिरहेको दाबी गर्दै काँग्रेसले निर्वाचन प्रक्रिया स्वतन्त्र, पारदर्शी, मितव्ययी र भयमुक्त बनाउन आचारसंहिताको पूर्ण पालना अनिवार्य गराउन आयोग सक्रिय हुनुपर्ने माग राखेको छ ।
ज्ञापन पत्रमा राष्ट्रिय झण्डाको प्रयोगसम्बन्धी आयोगको निर्देशन विपरीत झण्डाको दुरुपयोग भइरहेको आरोपसमेत उल्लेख गरिएको छ । साथै सामाजिक सञ्जालमार्फत मिथ्या सूचना फैलाइ जनमत प्रभावित गर्ने प्रयास भइरहेको भन्दै यस्ता गतिविधि रोक्न नियामक निकायले आवश्यक कदम चाल्नुपर्ने काँग्रेसको माग छ ।
