काठमाडौँ। राष्ट्रिय स्वतन्त्र पार्टीका वरिष्ठ नेता बालेन्द्र साह ‘बालेन’ ले सिंगो देशबासीलाई आफ्नै देशमा उत्पादन भएको तरकारी खुवाउन जरुरी रहेको बताएका छन् ।
शुक्रबार चितवनमा आयोजित चुनावी सभालाई सम्बोधन गर्ने क्रममा उनले किसानलाई केही नेता र बिचौलियाले सिन्डिकेटमा पारेर देशबाहिरको तरकारी खुवाउने काम गरिरहेको आरोप लगाए ।
‘देशबासीलाई आफ्नै तरकारी खुवाउन जरुरी छ । किसानलाई सही मूल्य दिन जरुरी छ,’ बालेनले भनेका छन् ।
साथै, उनले चितवनमा किसानले सही मूल्य र बजार नपाएको समस्या भएको जिकिर गरे ।
‘किसानले सही मूल्य र बजार नपाएको समस्या रहेछ । केही सीमित बिचौलिया, केही सीमित नेताहरूको सिन्डिकेटले पारी अनुदान नै अनुदानले कृषि हुन्छ,’ बालेनले भने, ‘त्यो सस्तोजस्तो देखिन्छ । त्यो देखाएर यहाँको किसानको चाहिँ महँगो जस्तो देखाएर भ्रम सिर्जना गराएर मार्ने काम भएको छ । त्यो रोक्न जरुरी छ ।’
