काठमाडौँ- प्रधानमन्त्री सुशीला कार्कीले हिमाली जिल्ला मुस्ताङको स्थलगत भ्रमण गर्दै स्थानीय बस्तीको अवस्था तथा पूर्वाधारको अवलोकन गरेकी छन्।
निर्धारित मितिमा प्रतिनिधिसभा सदस्य निर्वाचन सम्पन्न गर्ने तयारी भइरहेका बेला मौसमीय अवस्थाले हिमाली क्षेत्रमा प्रभाव पार्न सक्ने चर्चाका बीच उक्त भ्रमण सम्पन्न भएको हो।
प्रधानमन्त्री कार्कीले यसअघि घोषणा गरिएअनुसार फागुन २१ गते नै देशभर एकै चरणमा निर्वाचन आयोजना गर्ने सरकारी प्रतिबद्धता दोहोर्याएकी छन्। भ्रमणका क्रममा उनले स्थानीय समुदायसँग प्रत्यक्ष संवाद गरी क्षेत्रगत समस्या र आवश्यकताबारे जानकारी लिएको जनाइएको छ।
त्यसैगरी, जिल्ला प्रशासन तथा सम्बन्धित सरकारी निकायका पदाधिकारीहरूसँग भेटघाट गर्दै निर्वाचन व्यवस्थापन, सुरक्षात्मक तयारी र आवश्यक सामग्री आपूर्तिको अवस्थाबारे जानकारी लिएको बताइएको छ।
मुस्ताङ बसाइँका क्रममा प्रधानमन्त्रीले मुक्तिनाथ मन्दिरमा पुगेर पूजाआजा समेत गरेकी छन्।
