काठमाडौँ। नेपाली काँग्रेसका उपसभापति विश्वप्रकाश शर्माले बदलिएको काँग्रेसले प्रतिनिधि सभा निर्वाचनमा बहुमत ल्याउने दाबी गरेका छन् ।
आइतबार आगन्तुकहरूलाई पार्टीमा भित्र्याउँदै उपसभापति शर्माले देशभर काँग्रेसका पक्षमा माहौल बढ्दै गएको दाबी गर्दै एक हप्ताभित्रै काँग्रेस बहुमत ल्याउने ठाउँमा पुग्ने बताएका हुन् ।
अहिलेकै अवस्थामा काँग्रेस सबैभन्दा ठुलो दल बन्ने निश्चित देखिएको बताउँदै उनले भने, ‘यही गतिमा जनमत बढ्दै जाँदा आगामी एक हप्ताभित्र काँग्रेसले बहुमत ल्याउने तहमा पुग्छ ।’
काँग्रेस जेन जेड आन्दोलनपछि नयाँ भएको एक मात्र शक्ति रहेको उपसभापति शर्माले टिप्पणी गरे । काँग्रेस बदलिएपछि पार्टीमा समाहित हुनेको संख्या वृद्धि भइरहेको उनको दाबी छ ।
फागुन २१ को प्रतिनिधिसभा निर्वाचनमा काँग्रेसलाई जिताउन सम्पूर्ण नेता कार्यकर्ता एक ढिक्का भएर लागेको उपसभापति शर्माले दाबी गरेका छन् ।
