काठमाडौँ । सार्वजनिक निकायबाट प्रकाशित हुनुपर्ने बोलपत्र सूचनासम्बन्धी भ्रष्टाचार प्रकरणमा विशेष अदालतले आंशिक रूपमा दोष प्रमाणित हुने फैसला सुनाएको छ । अदालतले सो मुद्दामा संलग्न ठहर गरिएका पाँच जनालाई आरोपबाट मुक्त गरेको छ भने एक जनालाई कैद र जरिवानाको सजाय तोकेको छ ।
अख्तियार दुरुपयोग अनुसन्धान आयोगले दायर गरेको उक्त मुद्दामा सुनुवाइपछि विशेष अदालतले पत्रिकाका स्थानीय प्रतिनिधि ओमप्रकाश यादवलाई दोषी ठहर गरेको हो । अदालतको संक्षिप्त फैसलाअनुसार उनलाई छ महिनाको कैद तथा दुई लाख १२ हजार रुपैयाँभन्दा बढी रकम बराबरको जरिवाना तोकिएको छ । साथै, सो बिगो रकमको चार प्रतिशत अपराधपीडित संरक्षण कोषमा जम्मा गर्न आदेश दिइएको छ ।
उक्त मुद्दामा विशेष अदालतका अध्यक्ष सुदर्शनदेव भट्ट र सदस्य हेमन्त रावल सम्मिलित इजलासले फैसला गरेको हो ।
प्रकरण रौतहटको फतुवा विजयपुर नगरपालिकासँग सम्बन्धित छ । नगरपालिकाले आर्थिक वर्ष २०७८/७९ मा कृषकहरूका लागि स्प्रे टंकी खरिद गर्न बोलपत्र आह्वान गरेको थियो । यस प्रयोजनका लागि २०७८ माघ १८ गते नगरपालिकाबाट पत्राचार गरिएको र त्यसपछि माघ २० गते ‘राष्ट्रिय जनसवाल’ तथा माघ २७ गते ‘तराई पोस्ट’ नामक पत्रिकामा सूचना प्रकाशित भएको देखाइएको थियो ।
अदालतको फैसलासँगै यस मुद्दामा संलग्न भनिएका अन्य कर्मचारी तथा पत्रिकाका सम्पादक भने आरोपमुक्त भएका छन् ।