काठमाडौँ । प्रधानमन्त्री सुशीला कार्कीले प्रतिनिधि सभा निर्वाचन पूर्वनिर्धारित मिति र एउटै चरणमा सम्पन्न हुने स्पष्ट पार्दै आम नागरिकलाई आश्वस्त रहन आग्रह गरेकी छन्।
बिहीबार जनक शिक्षा सामग्री केन्द्रस्थित मतपत्र छपाइ केन्द्रको स्थलगत अनुगमनपछि सञ्चारकर्मीसँग प्रतिक्रिया दिँदै प्रधानमन्त्री कार्कीले निर्वाचन प्रक्रिया तोकिएको समयमै अघि बढिरहेको बताइन्। उनले निर्वाचनका क्रममा देशका सबै भूभागमा मौसमसमेत अनुकूल रहने विश्वास व्यक्त गर्दै मतदाताले कुनै अवरोधबिनै मतदान गर्न सक्ने वातावरण सुनिश्चित गरिने उल्लेख गरिन्।
प्रधानमन्त्रीले निर्वाचन सम्पन्न भएपछि निर्वाचित प्रतिनिधि सभालाई विधिसम्मत रूपमा सरकारको जिम्मेवारी हस्तान्तरण गरिने र त्यसपछि वर्तमान सरकार कार्यमुक्त हुने बताइन्। निर्वाचन प्रक्रियालाई स्वच्छ, निष्पक्ष र भयमुक्त बनाउन निर्वाचन आयोगका पदाधिकारीहरूले खेलेको भूमिकाको उनले सराहना पनि गरिन्।
उनका अनुसार निर्वाचनको विश्वसनीयता र समयपालनालाई सरकारको प्राथमिकतामा राखेर आवश्यक सबै तयारी अघि बढाइएको छ।
