काठमाडौँ । राष्ट्रिय स्वतन्त्र पार्टीका वरिष्ठ नेता तथा झापा निर्वाचन क्षेत्र नं. ५ का उम्मेदवार बालेन्द्र साह (बालेन)ले खुवालुङ सप्तकोशी क्षेत्रमा अवस्थित किराँती तथा नेपाली समुदायका लागि पवित्र र ऐतिहासिक स्थल भएको बताएका छन्।
प्रतिनिधि सभा निर्वाचनको प्रचारप्रसारका क्रममा देशव्यापी दौडाहामा रहेका उनले सोही क्रममा खुवालुङ क्षेत्रमा पुगेर सामाजिक सञ्जालमार्फत आफ्नो धारणा सार्वजनिक गरेका हुन्। उनले मुन्धुममा खुवालुङलाई ‘सभ्यताको द्वार’ का रूपमा लिइने उल्लेख गरेका छन्।
उनका अनुसार मुन्धुम पाठ तथा जीवनचक्रसँग सम्बन्धित संस्कारहरूमा खुवालुङको अनिवार्य स्मरण हुने भएकाले यो स्थल जीवित सांस्कृतिक–आध्यात्मिक परम्पराको प्रतीकका रूपमा रहेको छ। साथै, खुवालुङले किराँती सभ्यता, आदिवासी पहिचान तथा मानव र प्रकृतिबीचको सम्बन्धलाई प्रतिबिम्बित गर्ने उनले उल्लेख गरेका छन्।
