काठमाडौँ । त्रिभुवन अन्तर्राष्ट्रिय विमानस्थल अन्तर्गतका भन्सार संरचनामा कार्यरत तीन जना कर्मचारीलाई अख्तियार दुरुपयोग अनुसन्धान आयोगले घुस रकमसहित नियन्त्रणमा लिएको छ। नियन्त्रणमा पर्नेमा एक भन्सार अधिकृत, एक नायव सुब्बा र एक कार्यालय सहयोगी रहेका छन्।
आयोगका अनुसार वैदेशिक हुलाकमार्फत कुरियर सेवाबाट विदेशमा सामग्री पठाउने क्रममा सेवाग्राहीसँग अनियमित रकम असुली भइरहेको भन्ने सूचनाका आधारमा निगरानी बढाइएको थियो। सोही क्रममा डिल्लीबजारस्थित गोश्वारा हुलाक कार्यालयबाट उनीहरूलाई नियन्त्रणमा लिइएको हो।
नियन्त्रणमा परेका व्यक्तिहरूमा वैदेशिक हुलाक भन्सार शाखामा कार्यरत भन्सार अधिकृत इन्द्र न्यौपाने, गोश्वारा हुलाक कार्यालय पार्सल (निकासी) शाखाका नायव सुब्बा छविप्रसाद रिसाल तथा कार्यालय सहयोगी गणेशप्रसाद पुडासैनी रहेका छन्।
अख्तियारले कार्यालय सहयोगी पुडासैनी प्रयोग गर्ने कार्यकक्षको दराजबाट घुसस्वरूप लिइएको १० हजार रुपैयाँसहित स्रोत नखुलेको ४० हजार ३५० रुपैयाँ बरामद गरेको जनाएको छ। साथै उनको साथबाट थप ९६ हजार ७० रुपैयाँ फेला परेको आयोगले जानकारी दिएको छ, जसअनुसार उनको जिम्माबाट जम्मा १ लाख ४६ हजार ४२० रुपैयाँ बरामद भएको छ।
त्यसैगरी, नायव सुब्बा रिसालको साथबाट घुसबापत प्राप्त २० हजार रुपैयाँ र स्रोत नखुलेको १८ हजार ८४८ रुपैयाँ गरी कुल ३८ हजार ८४८ रुपैयाँ फेला परेको आयोगले जनाएको छ।
आयोगका अनुसार तीनै जनाबाट गरी स्रोत नखुलेको रकमसहित जम्मा २ लाख ६८ हजार २८८ रुपैयाँ बरामद भएको छ। साथै विभिन्न व्यक्तिहरूबाट संकलन गरिएको आशंका गरिएका २३ थान मोबाइल फोन पनि नियन्त्रणमा लिइएको छ।
