काठमाडौँ। नेपाल आयल निगमले डिजेल र मट्टितेलको खुद्रा मूल्य समायोजन गर्दै प्रतिलिटर तीन रुपैयाँका दरले वृद्धि गरेको छ। संशोधित मूल्य आज रातिदेखि लागू हुने निगमले जनाएको छ।
भारतीय आयल कर्पोरेसनबाट प्राप्त नयाँ मूल्य सूचीअनुसार आयात मूल्य बढेपछि डिजेल र मट्टितेलको भाउ समायोजन गर्नुपरेको निगमको भनाइ छ। यद्यपि पेट्रोल र खाना पकाउने एलपी ग्यासको खुद्रा मूल्यमा भने हाल कुनै परिवर्तन गरिएको छैन।
निगमका अनुसार आईओसीबाट पेट्रोलमा प्रतिलिटर १२ पैसा र एलपी ग्यासमा प्रति सिलिन्डर ४५ रुपैयाँ ४१ पैसाले मूल्य वृद्धि भएर आएको भए पनि उपभोक्तामा तत्काल भार नपरोस् भन्ने उद्देश्यले यी दुई पदार्थको मूल्य यथावत् राखिएको हो।
यसैबीच, हवाई इन्धनतर्फ आन्तरिक उडानका लागि प्रतिलिटर एक रुपैयाँले मूल्य घटाइएको छ। अन्तर्राष्ट्रिय हवाई इन्धनको हकमा काठमाडौँका लागि प्रति किलोमिटर सात अमेरिकी डलरले मूल्य घटाइएको निगमले जनाएको छ। पोखरा र भैरहवामा भने हवाई इन्धन ब्रेक-इभन बिन्दुमा बिक्री मूल्य कायम गरिएको छ।
