काठमाडौँ । गृहमन्त्री ओमप्रकाश अर्यालले आगामी निर्वाचनलाई सुरक्षित, मर्यादित र भयमुक्त वातावरणमा सम्पन्न गराउन सरकार पूर्ण रूपमा प्रतिबद्ध रहेको बताएका छन्।
बिहीबार निर्वाचन आयोगका पदाधिकारीहरूसँग भएको छलफलका क्रममा गृहमन्त्री अर्यालले निर्वाचन प्रक्रियामा संलग्न सबै पक्षको सुरक्षाका लागि आवश्यक व्यवस्था मिलाइएको जानकारी गराए।
उनले निर्वाचनको शान्ति र सुरक्षा खल्बल्याउने कुनै पनि गतिविधि सह्य नहुने स्पष्ट पार्दै त्यसमा संलग्न जो–कोहीमाथि कानुनअनुसार कडा कारबाही गरिने बताए।
उनका अनुसार गृह मन्त्रालयले निर्वाचन आयोगको कार्यतालिकासँग समन्वय गरी विस्तृत सुरक्षा योजना कार्यान्वयन गरिरहेको छ। साथै आपराधिक क्रियाकलाप र निर्वाचन विरोधी गतिविधिप्रति शून्य सहनशीलताको नीति अपनाएर सुरक्षा निकाय परिचालन गरिएको जानकारी पनि छलफलमा दिइएको थियो।
उक्त अवसरमा कार्यवाहक प्रमुख निर्वाचन आयुक्त रामप्रसाद भण्डारीले प्रतिनिधि सभा सदस्य निर्वाचनको तयारीका क्रममा सरकारबाट प्राप्त सहयोग र सहकार्यप्रति आभार व्यक्त गरे। उनले निर्वाचन व्यवस्थापनसम्बन्धी सम्पूर्ण तयारी पूरा भइसकेको जानकारी पनि गराएका थिए।
