काठमाडौँ । प्रधानमन्त्री सुशीला कार्कीले मुलुकले भोगिरहेका विविध चुनौती र संकटको सामना आत्मबलका साथ गर्नुपर्ने आवश्यकता औँल्याएकी छन्।
आइतबार राजधानीमा आयोजित नेपाल खुला विश्वविद्यालयको पहिलो दीक्षान्त समारोहलाई सम्बोधन गर्दै प्रधानमन्त्री कार्कीले विद्यमान अव्यवस्था र बेथिति समाधानका लागि राज्य र नागरिक दुवै पक्ष दृढतापूर्वक अघि बढ्नुपर्ने धारणा व्यक्त गरिन्।
उनले उच्च शिक्षाबाट दीक्षित जनशक्तिले प्राप्त ज्ञान र सीप स्वदेशमै प्रयोग गर्दै राष्ट्र विकासको प्रक्रियामा सक्रिय भूमिका निर्वाह गर्नुपर्नेमा जोड दिइन्। शिक्षित युवाहरू राष्ट्र निर्माणको अभियानमा केन्द्रित हुँदा मुलुकको समग्र उन्नतिमा सकारात्मक प्रभाव पर्ने प्रधानमन्त्रीको भनाइ थियो।
प्रधानमन्त्री कार्कीले अध्ययनका लागि विदेश गएका विद्यार्थीहरूले पनि जहाँ रहेर काम गरे तापनि देशको प्रतिष्ठा उँचो बनाउने जिम्मेवार नागरिकका रूपमा परिचय स्थापित गर्नुपर्ने उल्लेख गरिन्। साथै, उच्च शिक्षा प्रदान गर्ने संस्थाहरूले समयानुकूल सुधार र नवप्रवर्तनलाई आत्मसात् गर्दै थप सक्रिय र परिणाममुखी बन्नुपर्नेमा उनको जोड थियो।
कार्यक्रममा प्रधानमन्त्रीले नेपाल खुला विश्वविद्यालयले समसामयिक आवश्यकता र प्रविधिको विकाससँग तालमेल मिलाउँदै आफ्नो शैक्षिक भूमिका सुदृढ गर्दै लैजानुपर्ने आवश्यकता पनि औँल्याइन्।
