काठमाडौँ । राष्ट्रिय क्रिकेट टोलीका पूर्व कप्तान तथा सहायक प्रशिक्षक ज्ञानेन्द्र मल्लले आगामी आइसिसी टी-२० विश्वकपमा सहभागी हुन लागेको नेपाली टोलीप्रति शुभेच्छा व्यक्त गरेका छन्।
राष्ट्रिय स्वतन्त्र पार्टीको समानुपातिक सूचीमा समावेश भएपछि उनले प्रशिक्षकको भूमिकाबाट अलग भएको भए पनि आफ्नो उद्देश्य परिवर्तन नभएको बताएका छन्।
पार्टीको सूचीमा परेपछि मल्ल माघ महिनाको अन्तिम सातादेखि भारत र श्रीलंकामा आयोजना हुने विश्वकप तयारी तथा प्रतियोगितासँग सम्बन्धित सहायक प्रशिक्षकको जिम्मेवारीबाट बाहिरिएका थिए। त्यसपछि उनले सामाजिक सञ्जालमार्फत सार्वजनिक धारणा राख्दै नयाँ भूमिकामा प्रवेश गरे पनि लक्ष्य भने यथावत् रहेको उल्लेख गरेका छन्।
आइतबार फेसबुकमा लेखिएको सन्देशमा मल्लले खेल मैदान परिवर्तन भएजस्तै जिम्मेवारीको क्षेत्र फरक भए पनि मूल उद्देश्य उही रहेको संकेत गरेका छन्। उनले आफूले रोजेको परिवर्तन व्यक्तिगत पद प्राप्तिको चाहनाबाट नभई भविष्यप्रतिको दायित्वबोधबाट प्रेरित भएको स्पष्ट पारेका छन्।
उनले खेल र सार्वजनिक जीवन दुवै क्षेत्रमा दीर्घकालीन प्रतिबद्धता कायम राख्ने आशय व्यक्त गरेका छन् ।
