काठमाडौँ । नेकपा एमालेले रुपन्देही निर्वाचन क्षेत्र नम्बर २ मा आगामी प्रतिनिधि सभा निर्वाचनलाई लक्षित गर्दै निर्वाचन परिचालन संरचना औपचारिक रूपमा गठन गरेको छ। सोही अवसरमा क्षेत्रीय स्तरको पार्टी कार्यालय पनि सञ्चालनमा ल्याइएको छ।
शुक्रबार बुटवलमा आयोजित कार्यक्रममा क्षेत्रीय अध्यक्ष ऋषि पाण्डेको अध्यक्षतामा निर्वाचन परिचालन कमिटी सार्वजनिक गरिएको हो। कार्यक्रममा पार्टी नेतृत्व तथा कार्यकर्ताको उल्लेखनीय उपस्थिति रहेको थियो।
कार्यक्रममा एमाले उपाध्यक्ष तथा उक्त क्षेत्रका प्रतिनिधि सभा सदस्यका उम्मेदवार विष्णु पौडेलले आगामी कार्यकालमा विकासको दायरा विस्तार गर्दै सामाजिक र मानवीय पक्षलाई प्राथमिकतामा राख्ने प्रतिबद्धता व्यक्त गरे। उनले भौतिक पूर्वाधारसँगै शिक्षा, स्वास्थ्य र रोजगारीका क्षेत्रमा केन्द्रित कार्यक्रमलाई प्रमुख कार्यसूची बनाइने धारणा राखे।
रुपन्देहीमा सम्पन्न भएका पूर्वाधार विकासका कार्यहरू अन्य क्षेत्रका लागि उदाहरणीय बनेको उल्लेख गर्दै पौडेलले आगामी चरणमा नागरिकको जीवनस्तर उकास्ने र आयआर्जनका अवसर विस्तार गर्ने योजनामा केन्द्रित भएर काम गर्ने बताए।
आफ्ना विगतका गतिविधि र योगदानको आधारमा जनताबाट मूल्यांकनको अपेक्षा गर्दै उनले मतदातालाई निष्पक्ष ढंगले निर्णय लिन आग्रह गरे।