काठमाडौँ । नागरिक उन्मुक्ति पार्टी नेपालका संरक्षक रेशमलाल चौधरीले निर्वाचन अधिकृतको कार्यालयबाट गरिएको आफ्नो उम्मेदवारी अस्वीकृतिको निर्णयविरुद्ध सर्वोच्च अदालतमा निवेदन दिएका छन्।
आगामी फागुन २१ गते हुने प्रतिनिधि सभा निर्वाचनका लागि कैलाली निर्वाचन क्षेत्र नं १ बाट प्रत्यक्षतर्फ दर्ता गरिएको उनको उम्मेदवारी बिहीबार खारेज भएपछि चौधरीले सो निर्णय खारेजीको मागसहित रिट निवेदन दायर गरेका हुन्। निर्वाचन अधिकृतको निर्णयलगत्तै उनले भोलिपल्ट सर्वोच्च अदालतमा निवेदन पेश गरेका थिए।
सर्वोच्च अदालत प्रशासनका अनुसार उक्त रिट दर्ता भइसकेको छ र त्यसको सुनुवाइका लागि आइतबार पेसी तोकिएको छ।
चौधरी टीकापुर घटनासम्बन्धी मुद्दामा राष्ट्रपति मार्फत आममाफी पाइसकेका व्यक्ति हुन्। तर निर्वाचन अधिकृतको कार्यालयले प्रतिनिधिसभा सदस्य निर्वाचन ऐनको प्रावधानअनुसार जन्मकैदको सजाय भोगेका व्यक्तिलाई उम्मेदवार बन्न नपाउने व्यवस्था रहेको उल्लेख गर्दै उनको उम्मेदवारी खारेज गरेको जनाएको छ।
