काठमाडौँ । आगामी फागुन २१ गते हुने प्रतिनिधि सभा सदस्य निर्वाचनको तयारी स्वरूप निर्वाचन आयोगले सूचना तथा जिज्ञासा व्यवस्थापनका लागि विशेष टेलिफोन सेवा सञ्चालनमा ल्याएको छ।
अघिल्ला निर्वाचनमा प्रयोग हुँदै आएको अभ्यासलाई निरन्तरता दिँदै यस पटक पनि आयोगले कल सेवा केन्द्र सक्रिय बनाएको हो।
निर्वाचन आयोगका अनुसार कान्तिपथस्थित केन्द्रीय कार्यालयबाट सञ्चालन भइरहेको उक्त सेवामार्फत निर्वाचन प्रक्रियासँग सम्बन्धित विषयमा मतदाता, नागरिक तथा अन्य सरोकारवालाका प्रश्न तथा जिज्ञासाको उत्तर प्रदान गरिने छ।
आयोगका प्रवक्ता नारायणप्रसाद भट्टराईका अनुसार सेवा प्रवाहका लागि छुट्टाछुट्टै छ वटा डेस्क व्यवस्था गरिएको छ।
उक्त सेवा प्रत्येक दिन बिहान ९ बजेदेखि साँझ ६ बजेसम्म उपलब्ध रहने छ। मतदाता तथा सरोकारवालाले नि:शुल्क टोल-फ्री नम्बर ११०२ मा फोन गरी आवश्यक जानकारी लिन सक्नेछन्।
