काठमाडौँ । प्रधानमन्त्री सुशीला कार्कीले कर्णाली स्वास्थ्य विज्ञान प्रतिष्ठानमा आधारभूत पूर्वाधारको अभाव कायमै रहेको बताएकी छन्।
बुधबार सिंहदरवारमा आयोजित कर्णाली स्वास्थ्य विज्ञान प्रतिष्ठानको १२ औँ सभालाई सम्बोधन गर्दै प्रधानमन्त्री कार्कीले यस्तो बताएकी हुन्।
उनले जुम्लाजस्तो दुर्गम क्षेत्रमा प्रतिष्ठान स्थापना हुनु आफैँमा महत्त्वपूर्ण उपलब्धि भए पनि आवश्यक संरचना नहुनु बिडम्वनापूर्ण भएको उल्लेख गरिन्। उनले बजेट स्थानान्तरण गरेर स्रोत जुटाउन समेत सरकारलाई समस्या हुने गरेको बताइन्।
उनले भनिन्, ‘जुम्लाजस्तो ठाउँमा कर्णाली स्वास्थ्य विज्ञान प्रतिष्ठान खोल्दा खेरी त्यहाँका स्थानीयलाई केही न केही सुविधा त पुगेकै छ। सानो सानो उपचार गर्नको लागि पनि बाहिर जानुपर्थ्यो। अहिले त्यसको समाधान भएको छ। स्वास्थ्य विज्ञान प्रतिष्ठानको विकास भइसकेपछि एउटै संस्थाले पनि त्यो क्षेत्रको विकासका लागि धेरै नै महत्त्व राख्छ। जुन योजना तपाइहरूले देखाउनुभएको छ।’
प्रधानमन्त्री कार्कीले नियमित काम गर्न खोज्दा विभिन्न अवरोधको सामना गर्नुपर्ने तथा अख्तियार दुरुपयोग अनुसन्धान आयोगको हस्तक्षेपको डरले समेत काम गर्न कठिनाइ हुने गरेको बताइन्।
उनले भनिन्, ‘दुभार्ग्यको कुरा के छ भने तपाईँहरूले जुन यसको विकासको निम्ति सानो सानो कुरा मागिरहनुभएको छ त्यहाँ होस्टेल छैन, स्टाफ र डाक्टरहरूका लागि समेत आवासको सुविधा छैन भन्नुभयो। हामीले यति सानो कुरा पनि पूरा गर्न सकिरहेका छैनौँ। फेरि यताको उता गर्न पनि नहुने रहेछ। नियमित काम गर्दैछु भन्दापनि अनेकौँ बात लाग्छन् नि । कहिलेकाहीँ त अख्तियार पनि आइलाग्छ।’
उनले उपलब्ध स्रोत र साधनको अधिकतम सदुपयोग गरी नागरिकको सेवामा लागिरहन समेत प्रतिष्ठान प्रशासनलाई निर्देशन दिइन्।
