काठमाडौँ । पृथ्वी जयन्ती तथा राष्ट्रिय एकता दिवस-२०८२ का अवसरमा नेपाली सेनाले काठमाडौँलगायत देशका विभिन्न स्थानमा विविध कार्यक्रम आयोजना गरेको छ।
जंगी अड्डामा आयोजित विशेष समारोहमा राष्ट्रनिर्माता पृथ्वीनारायण शाहप्रति श्रद्धाञ्जली अर्पण गरिएको थियो। सो अवसरमा प्रधान सेनापति महारथी अशोक राज सिग्देलसहित पूर्व प्रधान सेनापति, रथीवृन्द, अधिकृत तथा अन्य पदाधिकारीहरूले पृथ्वीनारायण शाहको सालिकमा पुष्पहार अर्पण गरेका थिए।
कार्यक्रमअन्तर्गत गोरखा दरबारबाट राष्ट्रिय झण्डा तथा नेपाली सेनाका प्रथम पाँच पल्टन (श्रीनाथ, कालिबक्स, बर्दबहादुर, सबुज र पुरानो गोरखा) का झण्डा एवं दिपप्रज्वलनसहित सुरु गरिएको एकीकरण मार्ग पदयात्रा गोरखा, धादिङ र नुवाकोट हुँदै हनुमान ढोका दरबार क्षेत्रमा सम्पन्न भएको थियो।
पदयात्रापश्चात् जंगी अड्डामा आयोजित कार्यक्रममा पृथ्वी जयन्ती तथा राष्ट्रिय एकता दिवसका अवसरमा सञ्चालन गरिएको कविता प्रतियोगिताका उत्कृष्ट कृतिहरू वाचन गरिएको थियो भने लघुनाटक प्रस्तुति र इतिहासविद्बाट राष्ट्रनिर्माता पृथ्वीनारायण शाहको योगदानबारे प्रवचन प्रस्तुत गरिएको थियो। सोही अवसरमा विभिन्न प्रतियोगिताका विजेता, निर्णायक तथा वक्ताहरूलाई प्रधान सेनापतिले पुरस्कार तथा सम्मान प्रदान गरेका थिए।
इतिहासको जगेर्ना, पृथ्वी नारायण शाहको योगदानको संरक्षण तथा ऐतिहासिक र सांस्कृतिक सम्पदाको प्रवर्द्धन गर्ने उद्देश्यले नेपाली सेनाले गोरखा–काठमाडौँलगायत विभिन्न ऐतिहासिक मार्गहरूमा पदयात्रा तथा स्मृतिसम्बन्धी कार्यक्रमहरू सञ्चालन गर्दै आएको जनाएको छ।
नेपाली सेनाका अनुसार ३०औँ पृथ्वी जयन्ती तथा राष्ट्रिय एकता दिवसका अवसरमा स्वदेश तथा विदेशस्थित युनिटहरूमा समेत विविध कार्यक्रमहरू आयोजना गरिएको छ।
