म्याग्दी । प्रतिनिधि सभा सदस्य निर्वाचनलाई लक्षित गर्दै म्याग्दी जिल्लामा ६५१ जना निर्वाचन प्रहरी भर्नाका लागि आवेदन आह्वान गरिएको छ । निर्वाचन प्रहरी भर्ना छनोट तथा नियुक्ति समितिले मिति २०८२ भदौ २४ गते जारी गरेको एकीकृत सूचनाअनुसार नेपाल प्रहरी तथा सशस्त्र प्रहरी बल, नेपाल अन्तर्गत निर्वाचन प्रहरी पदका लागि योग्य नेपाली नागरिकबाट दरखास्त माग गरिएको हो ।
सूचना अनुसार निर्वाचन प्रहरीका लागि आवेदन दिने अन्तिम मिति २०८२ असोज ९ गतेसम्म तोकिएको छ । आवेदन जिल्ला प्रहरी कार्यालय बेनी, म्याग्दी तथा सशस्त्र प्रहरी बल नेपाल गुल्म हेडक्वाटर गलेश्वर म्याग्दीबाट प्राप्त गर्न र बुझाउन सकिने जनाइएको छ ।
भर्ना प्रक्रियाअन्तर्गत उम्मेदवारको उमेर सीमा दरखास्त फाराम भर्ने अन्तिम मितिसम्म कम्तीमा १८ वर्ष पूरा भई ४५ वर्ष ननाघेको हुनुपर्नेछ । साथै, नेपाली नागरिकता भएको, सामान्य लेखपढ गर्न जान्ने, कुनै फौजदारी अभियोगमा सजाय नपाएको तथा शारीरिक र मानसिक रूपमा स्वस्थ हुनुपर्ने योग्यता तोकिएको छ ।
निर्वाचन प्रहरी भर्नामा नेपाली सेना, नेपाल प्रहरी, सशस्त्र प्रहरी बल, नेपालका पूर्व सेवामा रहेका वा विभिन्न तहका निर्वाचनमा निर्वाचन प्रहरीको रूपमा अनुभव प्राप्त व्यक्तिलाई प्राथमिकता दिइने सूचनामा उल्लेख छ ।
छनोट प्रक्रियाअन्तर्गत प्रारम्भिक छनोट, शारीरिक परीक्षण तथा स्वास्थ्य परीक्षण पूरा भएपछि अन्तिम नतिजा प्रकाशन गरिनेछ । चयन भएका निर्वाचन प्रहरीलाई निर्वाचन अवधिभर खटाइने र नेपाल सरकारद्वारा तोकिएको सेवा सुविधा उपलब्ध गराइने जनाइएको छ ।
जिल्ला प्रशासन कार्यालय म्याग्दीका अनुसार निर्वाचनलाई शान्तिपूर्ण, निष्पक्ष र सुरक्षित रूपमा सम्पन्न गर्न पर्याप्त जनशक्ति व्यवस्थापन गर्न निर्वाचन प्रहरी भर्ना प्रक्रिया अघि बढाइएको हो ।
