सुर्खेत– कर्णाली प्रदेश भौतिक पूर्वाधार तथा सहरी विकास मन्त्रालयले जाजरकोटका २६ विद्यालय र स्वास्थ्य संस्था निर्माण गर्ने निर्णय गरेको छ । स्थानीय तहको सिफारिसमा भौतिक संरचना प्रदेश सरकारले बनाउन लागेको हो ।
भूकम्पबाट भत्किएका स्वास्थ्य संस्था र विद्यालय निर्माण गर्न १२ करोड ७० लाख रकम दिने निर्णय भएको पूर्वाधार विकास महाशाखाका सिनियर डिभिजनल इन्जिनियर प्रेमबहादुर ओलीले जानकारी दिए ।
चालु आर्थिक वर्षभित्र निर्माण गर्ने उद्देश्यका साथ २१ विद्यालय र पाँच स्वास्थ्य भवन निर्माण गर्न बजेट उपलब्ध भएको उनले जानकारी दिए ।
सात स्थानीय तहमा भूकम्पबाट भत्किएका विद्यालय र स्वास्थ्य संस्था निर्माण गर्ने निर्णय गरेको थियो । बारेकोट गाउँपालिकामा बारेकोट–१ को हिमालयदेवी विद्यालय, वडा नम्बर ३ को जनप्रिय आधारभूत विद्यालय स्याला मुलसाम, वडा नम्बर ४ को हिमालय आधारभूत विद्यालय गोठगाउँ र वडा नम्बर ८ को विश्व आधारभूत विद्यालय सेपुखोला निर्माण गर्ने निर्णय भएको छ ।
त्यसैगरी, नलगाड नगरपालिका–१ को जन आदर्श प्राथमिक विद्यालय ज्ञानेचौर, वडा नम्बर ९ को जनस्वास्थ्य प्राथमिक विद्यालय बासकोट र वडा नम्बर ४ को भानुभक्त माध्यमिक विद्यालय, भेरी नगरपालिका–२ को शङ्कर भवन माध्यमिक विद्यालय बाहुनथाना, वडा नम्बर १ को शिव माध्यमिक विद्यालय कालेगाउँ, छेडागाड नगरपालिका–१ को पिपलचौतारी आधारभूत विद्यालय, वडा नम्बर ८ को पशुपति आधारभूत विद्यालय रौतनगाउँ, वडा नम्बर ३ को सरस्वती आधारभूत विद्यालय चुवादेवली तथा कुशे गाउँपालिका–६ को जनविकास प्राथमिक विद्यालय घरङ्ग र वडा नम्बर ४ को धारापानी आधारभूत विद्यालय बनाउने निर्णय भएको छ ।
शिवालय गाउँपालिका–७ चन्द्रज्योति आधारभूत विद्यालय लयलकाडा, वडा नम्बर २ को इन्द्रज्योति आधारभूत विद्यालय, जुनिचाँदे गाउँपालिका–६ को मालटाकुरा प्राथमिक विद्यालय वडासेना, वडा नम्बर २ को महादेव प्राथमिक विद्यालय, वडा नम्बर ४ को जनशक्ति प्राथमिक विद्यालय, वडा नम्बर ११ को महेन्द्र माध्यमिक विद्यालय तथा वडा नम्बर ३ को नेपाल राष्ट्रिय आधारभूत विद्यालय निर्माण गरिने भएको छ । (रासस)
