काठमाडौँ । गोरखाको सहिद लखन गाउँपालिका-४ राईनासस्थित भिरबाट खसेका एक जनाको सशस्त्र प्रहरी बलले उद्धार गरेको छ ।
सोही ठाउँ बस्ने ५१ वर्षीय दीपक तिवारी अन्दाजी ५० मिटर उचाइको भिरबाट आज त्रिशूली नदीमा खसेका थिए । सशस्त्र प्रहरी बल नेपाल विपद् व्यवस्थापन तालिम शिक्षालय कुरिन टारमा सञ्चालन भइरहेको विपद् व्यवस्थापन तालिम प्रशिक्षार्थीहरूले ‘रिभर रन’ अभ्यासका क्रममा तिवारी नदीमा खसेको देख्नासाथ उद्धार गरेको सशस्त्र प्रहरी सह प्रवक्ता शैलेन्द्र थापाले जानकारी दिए।
सशस्त्र प्रहरी निरीक्षक प्रेमबहादुर तामाङको कमाण्डमा खटिएको गोताखोरसहितको टोलीले तिवारीलाई पानीभित्रबाट बेहोस अवस्थामा उद्धार गरेको थियो । उनको सशस्त्र प्रहरी बल नेपाल ट्रमा सेन्टर कुरिन टारमा उपचारपश्चात् घर पठाइएको थापाले जानकारी दिए ।
