नेपाल प्रिमियर लिग एनपीएल क्रिकेटको दोस्रो संस्करणको दोस्रो क्वालिफायरमा पुग्नका लागि काठमान्डु गोर्खाज र लुम्बिनी लायन्स खेल्दैछन् । आज बुधबार अपरान्ह ४ बजेपछि शुरु हुने यो इलिमिनेटर खेल जित्ने टोलीले फाइनल प्रवेशका लागि विराटनगर किंग्ससँग खेल्नेछ भने पराजित हुने टोली प्रतियोगिताबाट बाहिरिने छ । दुबै टोली एनपीएलको अन्तिम ४ मा पहिलोपटक पुगेका हुन् । पहिलो क्वालिफायरमा विराटनगर किङ्सलाई हराउँदै सुदूरपश्चिम रोयल्स फाइनल पुगिसकेको छ ।
काठमान्डुले लुम्बिनीसँग खेलेका अहिलेसम्मका दुबै खेल जितेको छ । काठमान्डु जीतको ह्याट्रिक गर्न चाहन्छ भने लुम्बिनी काठमाडौँसँगको पराजयको बदला लिँदै उपाधि होड कायम राख्न चाहन्छ । समुह चरणमा काठमाडौँले सात मध्ये ५ खेल जितेर तेस्रो स्थानमा रहँदै प्लेअफमा पुगेको हो भने लुम्बिनी चार जीत सहित चौथो रहँदै प्लेअफमा पुगेको हो । राष्ट्रिय टोलीका कप्तान रोहित पौडेल नेतृत्वको लुम्बिनी पछिल्ला तीन खेलमा अपराजित रहेको छ । यस्तै अनुभवी बलर करण केसीको नेतृत्व र मोन्टी देसाइको प्रशिक्षणमा रहेको काठमाडौँले यसपटक राम्रो खेलिरहेको छ ।
विशेषगरी काठमाडौँ ब्याटिङमा इंग्ल्यान्डका बेन चार्ल्सवर्थ र जोन सिम्पसन तथा मिलिन्द कुमारको अलराउन्ड प्रदर्शनमा बढी भर परेको देखिन्छ । बलिङमा भने करण केसी र साहब आलमको प्रदर्शनको भर काठमाडौँलाई बढी छ । साहबले प्रतियोगिताको अहिलेसम्मको १ ह्याट्रिक सहित १२ विकेट लिइसकेका छन् । आदिल आलमको प्रदर्शन सोचेजस्तो हुन नसक्दा भीम सार्कीले पनि एक खेलमा मात्र आफ्नो ब्याटिङको रवाफ देखाउन सकेका छन् ।
पहिलो खेल जितेपनि त्यसपछीका लगातार ३ खेल हारेको लुम्बिनी अन्तिमका ३ खेल जित्दै खेलमा फर्किएको हो । लुम्बिनीका लागि कप्तान पौडेलसहित शेर मल्ल, अविशेष गौतम, निकोलस डिकबेल्ला, डी आरसी सर्टलगायतको प्रदर्शन महत्तवपूर्ण रहेको छ । दिलीप नाथ सुमित महर्जन, सन्दीप जोरालगायतको प्रदर्शन टीमले आशा गरेअनुसार हुन सकिरहेको छैन ।
