नेपाल प्रिमियर लिग क्रिकेट एनपीएलमा पोखरा एभेन्जर्सले समर्थकलाई उत्साह भर्न थालेको छ ।
गत सिजनमा राम्रो खेल्न सकेपछि यसपटक बेलैबाट राम्रो प्रदर्शनको आशा राखेका समर्थक निराश बन्नु परेको थियो । ४ खेल खेल्दासम्म १ मात्र जित निकालेको पोखरा पाँचौ खेलमा पनि पराजित भए प्लेअफको सपना यसपटकका लागि पनि समाप्त हुने थियो ।
तर पाँचौ खेलमा पोखराले खेल मात्र जितेन समर्थकलाई ठुलो आशा पनि देखाएको छ । यहि खेलमा पोखराले २०१ रन बनायो । जुन जारी प्रतियोगिताको अहिलेसम्मको दोस्रो धेरै रन हो । २०० प्लसको स्कोर यसअघि विरानगर किंग्सले मात्र बनाउन सकेको छ।
त्यस्तै यो खेलमा पोखराका लागि खेलिरहेका इंग्लिस विकेटकिपर ब्याटर एडम रोसिङटनले सतक बनाए । उनको शतक पनि जारी एनपीएलमा दोस्रो शतक हो यसअघि कर्णालीका मार्क वाटले शतक प्रहार गरेका थिए ।
समग्र एनपीएलकै कुरा गर्ने हो भने पनि यो तेस्रो शतक हो । कर्णालीसँगको खेलमा पोखराका लागि खेलिरहेका विदेशी खेलाडी हावी रहे । हुन पनि पोखराले निकै परिवर्तन गरेको थियो । नियमित ओपनर दिनेश खरेललाई ड्रप गरेर रोसिङ्टन र कप्तान कुशल भुर्तेललाई खेलाइएको थियो ।
यस्तै इङ्ल्यान्डका जेसोन रोय, भारतका ऋषी धवन र श्रीलंकाका धनञ्जय लक्षणमाथिको विश्वासले काम गर्यो । इङ्ल्यान्डबाट विश्वकप विजेताको अनुभव लिइसकेका रोयले ३४ बलमा ४६ रन बनाए भने धवन र लक्षणले तीन तीन विकेट लिँदै आआफ्नो जिम्मेवारी निर्वाह गरे ।
लक्षणले त ११ बलमा नटआउट ३३ रनको बिष्फोटक इनिङ पनि खेले । भारतको राष्ट्रिय टोली र आइपीएल समेत खेलेका धवनका साथै रोय र लक्षणको यो पदर्शनले पोखराको टोलीबाट छुट्टिएका जेम्स निसमलाई पनि बिर्साइदियो ।
पोखराले धवनलाई अनुबन्ध गर्ने निर्णय हालै मात्र गरेको थियो । पोखराको अबको यात्रामा पनि मूलत यी खेलाडिको प्रदर्शनमा टीमको जित हार भर पर्ने देखिन्छ ।
