काठमाडौँ । मेची राजमार्गको इलाम नगरपालिका-९ भञ्ज्याङ गोलाईमा ट्रकसँग स्कुटर ठोक्किँदा दुई जनाको मृत्यु भएको छ ।
जिल्ला प्रहरी कार्यालय इलामका अनुसार झापाबाट इलामतर्फ आउँदै गरेको प्रदेश १-०१-००१ ख ४१०१ नम्बरको ट्रक र विपरीत दिशाबाट जाँदै गरेको प्रदेश १-०१-०१२ प ४८९९ नम्बरको स्कुटर आपसमा ठोक्किँदा स्कुटरमा सवार दुई जनाको ज्यान गएको हो ।
दुर्घटनामा इलाम नगरपालिका-९ गोलबस्तीका २६ वर्षीय डेबिड थापा मगर र माईजोगमाई-१ नयाँ बजारका १८ वर्षीय छेवाङ शेर्पाको मृत्यु भएको हो ।
दुर्घटनामा परेर गम्भीर घाइते भएका उनीहरूलाई इलाम जिल्ला अस्पतालका चिकित्सकले मृत घोषणा गरेका थिए । ट्रक चालक, इलाम नगरपालिका-५ बिब्ल्याटेका २५ वर्षीय रामप्रसाद श्रेष्ठलाई नियन्त्रणमा लिइएको प्रहरीले जनाएको छ।
