एनपीएल क्रिकेटको दोस्रो सिजनका १० खेल सकिँदा केही टिमले राम्रो प्रदर्शन गरेका छन् भने केहीले सोचेजस्तो खेल्न सकेका छैनन् । अहिलेसम्म सुदुरपश्चिम रोयल्स र विराटनगर किङ्सले शत प्रतिशत नतिजा निकाल्दै अर्को चरणको सम्भावनालाई बलियो बनाएका छन् । दुबै टोलीको ३ खेलबाट समान ६र६ अङ्क भए पनि रनरेटमा सुदुरपश्चिम पहिलो र विराटनगर दोस्रो स्थानमा रहेका छन्

दीपेन्द्रसिह ऐरीको कप्तानी र जगत टमाटाको प्रशिक्षणमा रहेको सुदुरपश्चिम ब्याटिङ र बलिङ दुबैमा अब्बल देखिएको छ । खासगरी कप्तान ऐरीको अलराउन्ड प्रदर्शन टीमको सबैभन्दा ठूलो हतियार बनेको छ । पछिल्लो खेलमा छिमेकी कर्णाली याक्सलाई ४५ रनले हराउन पनि कप्तान ऐरीको उच्च फर्म मुख्य हतियार बन्यो । उनले ३९ रन बनाउनुका साथै ४ विकेट लिए । गतबर्षको उपविजेता सुदुरपश्चिम रोयल्सले यसअघि पोखरालाई १८ र काठमाडौँलाई २९ रनले हराएको छ । उसका लागि जोश ब्राउन, क्रिस लिन, स्कट कुग्गिलिजिन, आरिफ शेख, विनोद भण्डारी, अविनाश बोहोरा लगायत खेलाडीले आआफ्नो भूमिका राम्रोसँग निर्वाह गरिरहेका देखिन्छन् । जसले गर्दा मैदानमा पुग्ने सर्वाधिक समर्थक रहेको टोलीमध्येको एक सुदुरपश्चिमका समर्थक अझ हौसिएका छन् ।

सुदुरपुर्वको टोली विराटनगर यसपटक बेलैबाट चर्चामा आएको थियो । भेट्रान फाप डू प्लेसिसलाई भित्र्याएको खबरदेखि पुबुदु दासानायकेलाई प्रशिक्षक बनाउनेसम्मका निर्णयका कारण राम्रो चर्चा पाएको विराटनगरले त्यसैअनुसार मैदानमा प्रदर्शन गरिरहेको छ । भलै डूप्लेसिस आइपुगेका छैनन् भने पुबुदु पनि औपचारिक रुपमा मैदानमा देखिएका छैनन् । कप्तान सन्दीप लामिछानेका साथै मार्टिन गुप्टिल, मर्चेन्ड डी ल्याङ्गे, शुभम रञ्जने, जर्ज मु््न्सी, सूर्य तामाङ, प्रतीस जीसी, नरेन भट्टलगायत खेलाडीले आआफ्नो जिम्मेवारी निर्वाह गरेपछि टोली बलियो बनेको छ । डूप्लेसिस मैदानमा आए पछि विराटनगरको प्रदर्शन अझ बलियो हुने अनुमान गर्न सकिन्छ ।

एनपीएलको घरेलु टोली काठमाडौँले भने सोचेजस्तो प्रदर्शन गर्न सकेको छैन । पहिलो खेल जीते पनि त्यसपछिका दुई खेल हारेसँगै काठमाडौँको प्रदर्शन अस्थिर देखिएको छ । नेपाली क्रिकेट र खेलाडीबारे राम्रो जानकारी भएका मोन्टि देशाइको प्रशिक्षण अनि भेट्रान अलराउन्डर करण केसीको कप्तानीमा रहेको काठमाडौँमा सबै खेलाडीले राम्रो प्रदर्शन गनै सकेका छैनन् । ठूलो भरोसा गरिएका मोहम्मद आदिल आलम तेस्रो खेलमा मात्र फर्ममा फर्किएका छन् । जसले टोलीलाई ठूलो राहत दिएको हुनुपर्छ । भीम सार्की चल्नै सकेका छैनन भने बेन चाल्र्सवर्थ, जोन सिमसनलगायत ब्याटरले अझै टीमका लागि गतिलो योगदान गर्न नसकेको देखिन्छ । मिलिन्द कुमार र सनी पटेलले औसत प्रदशृन गरिरहेका छन् । यस्तै साहब आलम, बसिर अहमद, रासिद खानहरुले पनि टीमको भरोसा अनुसार अझै खेल्न नसकिरहेको देखिन्छ । यसकारण खेलाडी अक्सनका बेला आफूलाई भाग्यमानी भएको भन्ने काठमाडौँको त्यसअनुसारको प्रदर्शन अझै देख्न नपाइएको हो ।

तालिकाको चौथो नम्बरमा रहेको लुम्बिनी लायन्स पनि जीतका लागि संघर्षरत छ । अहिलेसम्म खेलेका २ मध्ये एक जित र एक हार ब्यहोरेको लुम्बिनी ब्याटिङमा कप्तान रोहित पौडेलको मात्र भरमा रहेको जस्तो भान हुन्छ । रोहितको रन पनि टीट्वान्टीको जस्तो नभएर केही सुस्त देखिँदा टिम औसत प्रदर्शनमा खुम्चिएको छ । एउटा छिमेकी चितवनलाई हराएको लुम्बिनी अर्को छिमेकी कर्णालीसँग पराजित भएको थियो । गुल्बदिन नाइब, जे जे स्मिथ, डी आर्सी सर्ट जस्ता खेलाडीमाथिको विस्वास अझै खरो उत्रन सकेको छैन भने सन्दीप जोरा, सुमित महर्जन, दिलीप नाथलगायतले पनि आफ्नो ब्याटलाई थप बलियो बनाउन सके लुम्बिनीले राम्रो योगफल बनाउने आँकलन गर्न सकिन्छ ।

लुम्बिनीको छिमेकी चितवन राइनोजको प्रदर्शन पनि औसत मात्र देखिएको छ शुरुवाती २ खेलमा । आफ्नो पहिलो खेलमा कर्णालीलाई ४ विकेटले जितेको चितवन लुम्बिनीसँग ६ विकेटले पराजित भएको थियो । रवी बोपारार सैफ जैब, डेडिभ मलान, सोहेल तनबीरजस्ता विदेशी खेलाडी रहेको टोलीले सोचेजस्तो खेल्न सकिरहेको छैन । कप्तान कुशल मल्लको प्रदर्शन सामान्य मात्र देखिएको छ भने देव खनाल, मलान, लगायत खेलाडी जम्न सकेका छैनन् । जसको असर टीमको प्रदर्शनमा परिरहेको छ ।

याक अट्याक भन्ने नारासहित मैदानमा उत्रिएको कर्णाली याक्सको प्रदर्शन पनि अझै सुधार हुन सकेको छैन । ३ मध्ये २ खेल हारेर कर्णाली तालिकाको छैटौ नम्बरमा छ । जुन खेल पनि बलर मार्क वाटको विष्फोटक ब्याटिङका कारण सहज भएको थियो । उनले ४४ बलमा नटआउट ११४ रन बनाएका थिए । कप्तान सोमपाल कामी, नन्दन यादव फर्ममै देखिएका छन् भने युवराज खत्री, विपिन शर्माले पनि लय समाइरहेका छन् तर ब्याटिङमा भने समस्या देखिएको छ । खासगरी कर्णालीका अलराउन्डर गुल्सन झाको प्रदर्शन कमजोर देखिएको छ भने पवन सर्राफले सुदुरपश्चिमको खेलमा भने केही राम्रो प्रदर्शन गरेका थिए । विलियम बोसिस्टो, प्रियांक पाञ्चाल, नजिबुल्लाह जर्दानसँग टीमले अझै ठूलो आशा गरेको देखिन्छ । जुन यथार्थमा बदलिन जरुरी छ टीमको जितका लागि ।

गतवर्षको विजेता जनकपुर बोल्ट्सले यसपटक खराब शुरुवात गरेको छ । शिवनारायण चन्द्रपौललाई प्रशिक्षक बनाएर हौसिएको जनकपुरका कप्तान अनिल साह दुबै खेलमा फ्लप भएका छन् । वान डाउन भएर तीन नम्बरमा ब्याटिङ गर्न आएका उनले दुबै खेलमा खराब प्रदर्शन गरे । उनी स्वयम बलिङमा जानुले टोलीमा स्तरीय बलर नभएको पनि पुष्टि गरेको छ । अर्का स्पिनर ललित राजवंशी पनि चल्न सकेका छैनन् भने किशोर महतो र रुपेश सिंहको प्रदर्शन सामान्य मात्र छ । लाहिरु मिलन्था र सञ्जय कृष्णमुर्थिले ठिकै खेलिरहँदा मार्कि खेलाडी आसिफ सेखले पनि भरपर्दो इनिङ खेल्न सकेका छैनन् । जसले गर्दा साविक विजेता जनकपुर अहिलेसम्म खेलका २ मध्ये दुबै खेल हारेर तालिकाको पुछारबाट दोस्रो स्थानमा छ ।

एनपीएलको अर्को ठूलो टोली पोखरा एभेन्जर्सले पनि जारी प्रतियोगितामा लय समाउन सकिरहेको छैन । कुशल भुर्तेल र जेमी निसमबाहेक अन्य खेलाडीको तालमेल नमिल्दा पोखराले खेलेका दुबै खेल हार्न परेको थियो । पोखरा विराटनगरसँग ५३ र सुदरपश्चिमसँग १८ रनले पराजित भएको थियो । कप्तान कुशल मल्ल २ खेलको सिकाइबाट अबका प्रदर्शनमा सुधार गर्ने र खेल जित्दै अघि बढ्ने बताउँछन् ।

अब कुरा गरौँ मंगलबारको खेलको ।

आज एक खेल मात्र हुँदैछ । बेलुका ४ बजेपछि शुरु हुने खेलमा काठमाडौँ गोर्खाजले लुम्बिनी लायन्ससँग खेल्दै छ। ३ मध्ये १ खेल मात्र जितेको काठमाडौँ जितको दबाबमा छ भने २ मध्ये एक खेल मात्र जितेको लुम्बिनी पनि जितको खोजीमा हुनेछ । मोहम्मद आदिल आलम फर्ममा फर्कनु काठमाडौँका लागि खुशीको खबर भए पनि बाँकी खेलाडीको तालमेल मिलाउनु प्रशिक्षक मोन्टी देसाइका लागि टाउको दुखाइको विषय हुनसक्छ । यस्तै गतवर्षको प्रदर्शन विर्साउने हो भने लुम्बिनीले पनि टीमको तालमेलमा ध्यान दिनुपर्ने हुन्छ । खासगरी विदेशका खेलाडीहरुको लय फर्किए लुम्बिनीले काठमाडौँसामु बलियो चुनौती दिन सक्छ ।