काठमाडौँ । मधेश प्रदेशमा मुख्यमन्त्री नियुक्तिको विषयलाई लिएर असन्तुष्ट दलका नेता–कार्यकर्ताले सरकारी कर्मचारीमाथि समेत हातपात गरेका छन् । मुख्यमन्त्रीको कार्यकक्षमा रहेका कर्मचारीहरूमाथि कुटपिट भएको घटना सार्वजनिक भएको छ ।
तोडफोडमा उत्रिएको समूहले मुख्यमन्त्री तथा मन्त्रिपरिषद् कार्यालयको बढुवा शाखामा कार्यरत नायब सुब्बा (नासु) पंकज यादवलाई कुटपिट गरेको हो । उनले रेकर्ड फाइल जोगाउने प्रयास गर्दा केही व्यक्तिहरुले उनलाई कुटेका थिए ।
घटनाका क्रममा यादवको हातबाट फाइल खसेको थियो भने अर्को कर्मचारीले उनलाई भीडबाट फुत्काएर कोठा बाहिर निकालेका थिए ।
मुख्यमन्त्री नियुक्तिको विवादले मधेशमा स्थिति थप उग्र बनेको छ । प्रदेश प्रमुख र मुख्यमन्त्रीको कार्यालयमा तोडफोड भएको छ भने असन्तुष्ट नेता–कार्यकर्ताले मधेश भवन अगाडि टायर बालेर प्रदर्शन गरेका छन् ।
आज बिहानै नेपाली कांग्रेससहितका सांसदहरू मुख्यमन्त्रीको कार्यकक्षभित्र प्रवेश गरी तोडफोड गरेका थिए । सो क्रममा एक सांसदले नेपालको राष्ट्रिय झण्डा समेत निकालेर फालेका छन् ।
नेपाली कांग्रेस, जनता समाजवादी पार्टी (जसपा), लोकतान्र्त्रिक समाजवादी पार्टी (लोसपा) लगायतका प्रदेश सांसद र कार्यकर्ताले एमाले दलका नेता सरोज कुमार यादवलाई मुख्यमन्त्री नियुक्त गरिएको भन्दै विरोध जनाएका छन् ।
प्रदेश प्रमुख सुमित्रा सुवेदी भण्डारीले आज कात्तिक २४ गते बिहान करिब ४ बजे बिरामी भएको कारण देखाउँदै काठमाडौं प्रस्थान गर्ने बताएकी थिइन् । निवर्तमान मुख्यमन्त्री जितेन्द्र सोनलले उनलाई फूल दिएर स्वास्थ्यलाभको कामना गर्दै बिदाइ गरेका थिए ।
तर, त्यसपछि प्रदेश प्रमुख भण्डारी महोत्तरीको बर्दिबास नगरपालिका–३ कालापानीस्थित होटेल पानस पुगेकी थिइन्, जहाँ उनले एमाले संसदीय दलका नेता सरोज कुमार यादवलाई मुख्यमन्त्री पदको शपथ ग्रहण गराएकी थिइन् । उक्त घटनापछि मधेशको राजनीतिक वृत तीव्र रूपमा तातिएको छ ।
यस घटनाप्रति असन्तुष्ट दलहरूले कडा आपत्ति जनाएका छन् । निवर्तमान मुख्यमन्त्री तथा लोसपा नेता सोनलले प्रदेश प्रमुखले मधेश प्रदेशको अस्मिता लुटेको आरोप लगाएका छन् ।
त्यस्तै, जनमत पार्टीका अध्यक्ष डा. सीके राउतले मधेशलाई स्वायत्त घोषणा गर्ने अवसर यही भएको भन्दै प्रदेशसभाको बैठक सडकमा नै डाकेर भए पनि स्वायत्त घोषणा गर्न आह्वान गरेका छन् ।
