नयाँ दिल्ली – ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकासमन्त्री कुलमान घिसिङले नेपालका जलविद्युत तथा सौर्य जस्ता नविकरणीय ऊर्जामा अन्तर्राष्ट्रिय समुदायलाई लगानी गर्न आह्वान गरेका छन्।
मन्त्री घिसिङले भने, “नेपालको जलविद्युतको अपार सम्भावना, बढ्दो सौर्य क्षमता र प्रसारण पूर्वाधारका साथ हामी क्षेत्रलाई दिगो ऊर्जायुक्त बनाउन सक्छौं। म हाम्रा मित्र राष्ट्रहरू र साझेदारहरूलाई निम्तो दिन्छु—नेपालमा लगानी गर्नुहोस् र उज्यालो, हरित भविष्यको हिस्सा बन्नुहोस्।”
उनले उल्लेख गरे कि नेपालले सन् २०३५ सम्ममा १५ हजार मेगावाट नविकरणीय ऊर्जा निर्यात गर्ने लक्ष्य राखेको छ र यसका लागि भारतसँग उच्च क्षमताका प्रसारण लाइनको निर्माण कार्य जारी छ।
नेपालको लगभग ८३ हजार मेगावाट जलविद्युत सम्भावना र ४२ हजार मेगावाट पम्प स्टोरेज क्षमताले छिमेकी देशका सौर्य तथा वायु ऊर्जासँग उत्कृष्ट पूरकत्व प्रदान गर्नेछ।
मन्त्री घिसिङले भनाइ थप्दै भने, “क्षेत्रीय र विश्वव्यापी ग्रिड विकासले नविकरणीय ऊर्जा प्रवाहलाई सहज, दिगो र लागत-कुशल बनाउनेछ। यो दृष्टि ‘एक सूर्य, एक विश्व, एक ग्रिड’ अवधारणासँग मेल खान्छ र यसको सफल कार्यान्वयनका लागि क्षेत्रीय एकीकृत विद्यु्त बजार आवश्यक छ।”
